Dövlət başçısı ölkədə siyasi məhbusların olduğunu inkar etdi
Brüsseldə səfərdə olan dövlət başçısı Ilham Əliyev NATO-nun baş katibi Anders Rasmussenlə danışıqlardan sonra jurnalistlərin suallarını cavablandırıb. “Azadlıq” radiosunun əməkdaşı Əliyevə Azərbaycandakı siyasi məhbuslar barədə sual verib:
– Cənab prezident keçən dəfə Brüsselə səfəriniz zamanı dediniz ki, Azərbaycanda heç bir siyasi opponentiniz həbsdə deyil. Lakin Ilqar Məmmədov və Anar Məmmədli kimi fəallar hələ də həbsdədir. Siz hələ də o fikrinizdə qalırsız ki, Azərbaycanda siyasi məhbus yoxdur?
– Bəli, əlbəttə. Bu həmçinin Avropa Şurası Parlament Assambleyasının qərarı ilə təsdiq olunub. Dekabr ayında Avropa Şurasının bəzi üzvləri tərəfindən qaldırılmış bu məsələ qəbul olunmamışdı. Assambleya üzvlərinin əksəriyyəti bu qətnaməyə dəstək vermədi. Bu isə o deməkdir ki, keçən dəfə mən burada Avropa Komissiyasında dediyim “Azərbaycanda siyasi məhbus yoxdur” fikri Avropanın və dünyanın ən vacib institutlarından biri olan AŞ PA tərəfindən təsdiq edilir. Azərbaycan 10 ildən artıqdır ki, Avropa Şurasının üzvüdür, biz Avropa Insan Haqları Məhkəməsinin üzvüyük, bu da o deməkdir ki, Azərbaycanda siyasi məhbus ola bilməz. Əgər kimə qarşısa ədalətsiz davranış baş veribsə, bu haqda həmişə Avropa Məhkəməsinə müraciət etmək imkanı var və biz də bu qurumun qərarlarına həmişə əməl edirik.
Onu da demək istəyirəm ki, “siyasi məhbus” terminin müəyyənləşdirilmiş mənası yoxdur. Biz hesab edirik ki, Avropa Parlamenti və ya Avropa Şurası tərəfindən siyasi məhbus məhfumunun müəyyənləşdirilməsi yaxşı ideya olardı. O zaman da kimin siyasi məhbus olub-olmamasını müəyyən etmək olduqca asanlaşardı.
