Bundan sonra FHN suyu «Azərsu»ya, ikinci də əhaliyə satacaq; Suyun qiymətində artım gözlənilir
Bundan sonra “Azərsu” ASC-yə suyu Fövqəladə Hallar Nazirliyi satacaq. Avropa.info-nun məlumatına görə, artıq bununla bağlı hakimiyətdə razılaşma əldə edilib.
Məlumatda deyilir ki, uzun müddət bu sahəyə nəzarət uğrunda hakimiyyətdaxili qruplaşmalar arsında ciddi mübarizə gedib. Nəhayət, FHN digər qruplaşmalara qalib gəlib. Suya nəzarəti ələ keçirən FHN Bakının ən böyük su anbarı və göllərindən olan Ceyranbatan gölünü də öz rəhbərlik etdiyi qurumun nəzarətinə keçirib.
Bildirilir ki, FHN “Azərsu”ya suyun bir kubunu 6 qəpikdən satacaq. Bu isə “Azərsu”nun narazılığına səbəb olub. Lakin bu narazılıq suyun qiymətinin artırılması ilə bağlı hökumətin verdiyi razılıqdan sonra aradan qaldırılıb. Bu razılaşmaya əsasən “Azərsu”nun əhaliyə satılan suyun qiymətini 10 qəpik artıracaq. Beləliklə, Tarif Şurasının yaxın vaxtlarda suyun bir kubunun 42 qəpiyə satılacağı haqda qərar verəcəyi gözlənilir.
Məlumatla bağlı FHN və “Azərsu”nun mövqeyini öyrənmək mümkün olmayıb.
