Nəqliyyat naziri vətəndaşlara qarşı zorakılıq edən işçilərinin qarşısını niyə almır?
Nəqliyyat Nazirliyinin müfəttişlərinin vəhşiliyi barədə dəfələrlə deyilib-yazılmasına baxmayaraq, onların zorakılığına məruz qalan sürücülərin sayı getdikcə artır. Görünür, bu da cəzasızlıqdan irəli gəlir. Çünki sürücüləri vəhşicəsinə döyən müfəttişlərin məsuliyyətə cəlb olunması halına hələ ki, rast gəlinməyib. Baxmayaraq ki, onların əməlində açıq-aşkar cinayət tərkibi var.
Bu qəbildən olan daha bir hadisə baş verib. Sərnişin kimi maşına əyləşən və sonradan müfəttiş olduqlarını elan edən 4 nəfər sürücünü döyüb. “Anspress”in məlumatına görə, Kürdəmir sakini, 23 yaşlı Mikayılov Nəsir Şirvan oğlu paytaxtda taksi fəaliyyətilə məşğul olarkən nəqliyyat müfəttişlərinin zorakılığıyla üzləşib.
Sürücü bildirib ki, mülki geyimdə olan bu şəxslər müştəri kimi maşına əyləşiblər. Qapılar bağlanan kimi “müştərilər” əvvəlcə sənəd, daha sonra isə lisenziyasız taksi fəaliyyəti göstərdiyinə görə ondan pul tələb ediblər.
Sənədlərinin ələ keçməməsi üçün sürücü avtomobilini məcburən səkiyə dırmaşdırsa da, nəticəsi olmayıb. Müfəttişlər sənədləri götürərək avtomobillə ərazidən uzaqlaşıblar.
Maraqlıdır, nəqliyyat naziri Ziya Məmmədov qoçuluq edən işçilərinin qanunsuzluqlarının qarşısını almaq üçün niyə tədbir görmür?
Əmək Hüquqlarını Müdafiə Liqasının sədri Sahib Məmmədov deyir ki, Nəqliyyat Departamentinin fəaliyyətinin hansı qanunla tənzimləndiyi bilinmir. Onların bəziləri rayonlarda hüquq-mühafizə orqanlarının xüsusi geyim vasitələrindən də istifadə edirlər: “Bu müfəttişlər, hətta geyim formalarından da qanunsuz istifadə edirlər. Əlbəttə ki, taksi fəaliyyətinin tənzimlənməsinə ehtiyac var, sui-istifadə edən şəxslərə qarşı sanksiyalar tətbiq olunmalı, dövlətə müvafiq rüsum ödənilməlidir. Bunların hamısı başadüşüləndir. Amma bu üsulla idarəçilik səhvdir, çoxsaylı problemlərə gətirib çıxarır”.
Sahib Məmmədov onu da qeyd edir ki, nəqliyyat işçilərinin davranış qaydalarının hamısı qanuna ziddir. Məsələn, maşının dövlət-nömrə nişanının açılması, avtomobilin cərimə meydançasına aparılması və s. özlərinə aid olmayan funksiyaları da mənimsəyiblər: “Taksi xidmətinin lisenziyalaşması, işin tənzimlənməsi, burada baş verən sui-istifadə hallarının qarşısının alınması üçün ayrıca mexanizmlər olmalıdır. Amma kiməsə zor tətbiq etmək halları olmamalıdır. Sürücü fiksə olunmalı, aktlaşdırılmalı və müvafiq tədbirlər görülməlidir. Fəqət, hüquqi yolları qoyub belə üsullardan istifadə etmək yaramaz”.
Nigar
