Üzeyir Cəfərov: «Mirzəli Yusifovun həbsi xidməti fəaliyyəti ilə bağlı deyil, dövlət başçısının anti-korrupsiya bəyanatına bir «cavab» idi»
Heydər Əliyev adına Azərbaycan Ali Hərbi Məktəbinin (AAHM) keçmiş rəisi həbs edilib. Bu barədə APA-ya Bakı Hərbi Məhkəməsindən bildirilib. Məlumata görə, polkovnik Mirzəli Yusifov Cinayət Məcəlləsinin 311-ci (rüşvət alma) maddəsi ilə təqsirləndirilən şəxs qismində cəlb edilməklə barəsində 3 ay müddətinə həbs qətimkan tədbiri seçilib.
Qeyd edək ki, M. Yusifov əvvəllər Müdafiə Nazirliyinin 112 saylı alayının (sülhməramlı tabor da bu alayın tərkibindədir) komandiri olub. Daha sonra AAHM-ə qərargah rəisi təyin edilən M. Yusifov bir neçə il hərbi məktəbin rəisi vəzifəsini də icra edib. Zakir Həsənov müdafiə naziri təyin edildikdən sonra M. Yusifov vəzifədən uzaqlaşdırılıb.
Qeyd edək ki, Z.Həsənov müdafiə naziri təyin olunduqdan sonra S.Əbiyevin ordudakı bütün adamlarını vəzifədən çıxarıb. İndi görünür sabiq nazirin vəzifədən çıxarılan adamlarının həbsinə başlanılıb. Bu olayın S.Əbiyevin bir neçə gün əvvəlki sərt açıqlamasından sonraya təsadüf etməsi M.Yusifovun həbsinin təsadüfi olmadığı fikrini yaradır. Xatırladaq ki, S.Əbiyev ona qarşı hücumların haradan qaynaqlandığını bildiyini söyləmişdi.
Ekspert Üzeyir Cəfərov bildirdi ki, həbs M.Yusifovun xidməti fəaliyyəti ilə bağlı deyil. Ü.Cəfərov M.Yusofovun həbsinin səbəbləri ilə bağlı onda olan məlumatı da bizimlə bölüşdü: «Bir nəfər tanışı məktəb rəisi kimi Mirzəli Yusifovdan xahiş edib ki, tabeliyində kunsartlardan birinin bölgüsündə kömək etsin. Bu məqsədlə də Mirzəli Yusifova külli miqdarda rüşvət verilib. Sonra bu məsələ həllini tapmayandan sonra, həmin adam prokurorluğa ərizə ilə müraciət edib. Prokurorluqda müraciət əsasında Mirzəli Yusifovu həbs edib». Ü.Cəfərov onu da bildirdi ki, M.Yusifovun üzərində 90-cı illərdə qaldırılmış başqa bir cinayət işi də olub. Amma bu cinayət işi başa çatdırılmayıb. Cinayət işinin qaldırılmasına səbəb isə M.Yusifovun döyüşlər vaxtı Murovdakı hərbi hissəyə baş çəkməməsidir.
Ü.Cəfərov bundan başqa M.Yusifovun S.Əbiyevə yaxın olan kadr kimi təqdim olunmasıyla da razı deyil. M.Yusifovun həbsinin bir qədər gec həyata keçirildiyini deyən Ü.Cəfərov vurğuladı ki, M.Yusifov dövlət başçısının Nazirlər Kabinetinin toplantısında korrupsiyaya qarşı mübarizə aparılmalı olduğunu elan etməsinə «cavab» olaraq həbs edilib. Ü.Cəfərov hesab edir ki, artıq M.Yusifovun işi ictimailəşdiyinə görə o minimum 7-8 il həbsxanada keçirməli olacaq.
Hikmət
