«Hakimiyyət yalnız özü üçün zəruri saydığı, özünün işi üçün yarayan adamların maaşlarını artırır»
Nurəddin Məmmədli: «Hakimiyyətin maaş siyasəti olduqca biabırçı, sosial ədalət prinsiplərindən uzaq yanaşmadır»
Azərbaycan Mərkəzi Seçki Komissiyasının sədrinin, komissiya üzvlərinin və müvafiq olaraq dairə seçki komissiyalarının əməkdaşlarının aylıq vəzifə maaşları artırılıb. APA-nın məlumatına görə, Azərbaycan prezidentinin müvafiq sərəncamı ilə Maliyyə Nazirliyi tərəfindən MSK sədrinin, sədr müavinlərinin, katiblərinin, üzvlərinin, o cümlədən dairə seçki komissiyası sədrlərinin və katiblərinin maaşları müvafiq olaraq artırılıb.
MSK sədrinin maaşı 1655 manatdan 1855 manata, üzvlərin maaşları 1000 manatdan 1060 manata (vergilər tutulduqdan sonra), MSK katiblərinin maaşları müvafiq olaraq 1275 manata, DSK sədrinin maaşı 720 manata, DSK katiblərinin maaşları isə 500 manata qaldırılıb. Bütün artımlar 2013-cü il dekabrın 1-dən qüvvəyə minib.
MSK və DSK əməkdaşlarının əmək haqqının artımı da seçkidən əvvəl büdcə təşkilatlarında çalışanların əmək haqqı kimi təxminən 10 faiz artırılsa da, onların əmək haqqının yüksək olması artımın da daha çox olmasına səbəb olub. Yəni əgər 150-200 manat alan müəllim və həkimin əmək haqqına olan artım 15-20 manat oldusa, seçkilərdə hakimiyyətin maraqları üçün çalışanların əməkhaqqı artımı həkim və müəllimlərin bütün maaşından çoxdur. Bu sahədə çalışanların əksəriyyəti tam təminatlı şəxslər olsa da, hakimiyyət onların xidmətlərini daha yüksək qiymətləndirir və bu da təəccüblü deyil. Lakin MKS və DSK üzvlərinə dövlətin bu səviyyədə qayğısı birmənalıı qarşılanmır.
AXCP sədrinin müavini Nurəddin Məmmədli MSK əməkdaşlarının əksəriyyətinin başqa işdə də işlədiyini və ən azı iki yerdən maaş aldıqlarını deyir. Mövcud qanunvericiliyə görə isə, hər iki yerdən maaş almağı qanun qadağan edir. Ən yaxşı halda bir maaşın yarısı alınmalıdır. Amma bu qaydalara əməl olunmur. Digər tərəfdən, MSK-nın üzvlərinin maaşı deputatların maaşına yaxındır. Müəllimlərin, həkimlərin və digər kateqoriyaya aid olan insanların maaşı cəmi 10 faiz artırıldığı halda MSK əməkdaşlarının maaşının bu qədər yüksək olması bir daha hakimiyyətin xarakterindən irəli gəlir. Yəni bu hakimiyyət yalnız özü üçün zəruri saydığı, özünün işi üçün yarayan adamların maaşlarını artırır, öz ətraflarını yüksək səviyyədə maliyyələşdirirlər. Yerdə qalan insanlara isə bir növ ikinci dərəcəli adamlar kimi baxırlar: “Təsəvvür edin ki, ali kateqoriyalı həkim ən yaxşı halda 150 manat maaş alır. 150 manat maaş alan həkimə ”rüşvət alma” demək, mənəviyyatsızlıqdı. Rüşvət almaq böyük cinayət olsa belə, 150 manat maaşla heç bir həkim işləməz. Həkimlər ona görə işləyirlər ki, rüşvət almaq imkanı var. Bu gün müəyyən mənada bunu müəllimlərə və digər işçilərə də aid etmək olar. Yəni müəllim valideynin, həkim xəstənin düşmənidir. Beləliklə, bu proses cəmiyyətdə təlatüm yaradan faktor kimi qalmaqdadır”.
N.Məmmədlinin sözlərinə görə, hakimiyyətin maaş siyasəti istənilən halda olduqca biabırçı, sosial ədalət prinsiplərindən uzaq olan bir yanaşmadır.
Fizzə
