“Yeni Müsavat”ın partiyadan istefa verənlərlə bağlı aşağılayıcı münasibəti hiddətlə qarşılandı
Müsavat Partiyasının Milli Şuradan çıxmaq qərarı onun keçmiş müttəfiqləri və geniş ictimaiyyətdə olduğu kimi, partiyanın daxilində də narazılıq yaratdı. Bu səbəbdən Müsavatdan bir neçə nəfər istefa da verdi. Müsavat rəhbərliyinin müxalifət birliyindən ayrılmaq qərarını doğru çıxarmaq istəyən “Yeni Müsavat” qəzeti isə bu partiyanın daxilindəki narazılıqları da AXCP ilə əlaqələndirməyə və istefaları əhəmiyyətsiz hadisə kimi təqdim etməyə çalışır. Baş verənlərin mahiyyətini təhrif edərək, cəmiyyətə AXCP-Müsavat qarşıdurması kimi aşılayan “Yeni Müsavat” partiyadan istefa verən müsavatçıları AXCP-dən rüşvət almaqda belə, ittiham edir.
Qəzetin baş redaktoru Rauf Arifoğlu “Səni şiddətlə qınayıram, Əli Kərimli” məqaləsində yazır: “Tanımadığım bir Salyan sakinindən ərizə alıblar ki, Rauf Arifoğlunun açıqlamalarına görə Müsavatdan çıxıram, keçirəm AXCP-yə. Sonra bu ərizədən məqalə düzəldib, veriblər. Müsavatdan adam çıxarıb, bəlkə də ona rüşvət verib, yanına çəkirsən”. Yaxud, “Müsavatı tərk edənlər formal üzvlər idilər” yazısında Şəki müsavatçıları Azər Telmanoğlu və Elşad Məmmədli heç bir fəaliyyət göstərməməkdə ittiham olunur, “adı olub, özü olmayanlar” kateqoriyasına salınır. Guya, bu adamlar partiyada heç bir nüfuz sahibi olmayıblar, epizodik fəaliyyətləri olub.
İttiham olunan keçmiş müsavatçılardan bir neçəsi bizimlə söhbətdə deyilənlərə cavab verdilər.
Rauf Arifoğlunun “bəlkə də rüşvət veriblər” sözləri ilə ittiham etdiyi Salyan müsavatçısı Cavanşır İbrahimli deyir: “Mənim 58 yaşım var. 2001-ci ildə Müsavat partiyasının üzvü omuşam. Son vaxtlar partiyanın apardığı siyasətə və “Yeni Müsavat” qəzetinin baş redaktoru Rauf Arifoğlunun açıqlamalarına etiraz əlaməti olaraq, Müsavat partiyasını tərk etmişəm. Rauf Arifoğlu deyir ki, guya mənə rüşvət veriblər. Mən Rauf Arifoğludan 10 yaş böyüyəm, Salyana gələndə onu yüksək səviyyədə qarşılamışam. Görünür, Rauf Arifoğlu hamını öz arşını ilə ölçür. Adam şəxsiyyətin qoruyar. Mənim üçün Əli Kərimli, AXCP milyona dəyər. Kimdənsə rüşvət almaq bizim adətimiz deyil. Mən haqlı olaraq partiyadan çıxmışam. Bunu başqa cür qiymətləndirmək heç kimə şərəf gətirməz”.
Müsavatdan istefa verən Şəki rayon şöbəsinin üzvü Elşad Məmmədli: “Mən 20 il müsavatçı olmuşam. Əgər fəaliyyətim yox idisə, niyə məni partiyada saxlayırdılar? Hesab edirəm ki, Milli Şura xalqın ümid yeridir və bu birlik ətrafında birləşmək lazımdır. Müsavat partiyası isə mübarizədən qaçdı. Mən, Arif Hacılılara deyil, Rəsulzadə ideyalarına bağlıyam. Rauf Arifoğlu prezidentin dostudur və mən bu adamlara nifrət edirəm. Yaxşı olar ki, Rauf Arifoğlu əvvəlcə öz əqidəsini təmizləsin, daha sonra kiminsə fəaliyyətinə qiymət versin. Hesab edirəm ki, Cəmil Həsənli mühüm bir tapıntıdır və biz onun ətrafında birləşib mübarizə aparmalıyıq”.
Müsavatın Xətai rayon təşkilatının sədr müavini olmuş Şahin Hüseyn partiya sıralarından istefa verməsini əsaslandırdığını və bunun düzgün addım olduğunu bildirdi: “Mən uzun illər Müsavat partiyasının üzvü kimi fəaliyyət göstərmişəm, seçkilərdə fəal iştirak etmişəm. İndiki şəraitdə mən vətəndaş mövqeyi göstərib, düzgün qərar vermişəm. İndi “Yeni Müsavat” qəzeti istefalara müxtəlif don geyindirirsə, bu da təbiidir. Baş verənlərə hansısa formada cavab verməlidilər. Milli Şurdan getmək yanlış qərar idi, mən də bu yanlışda yer almaq istəmirəm”
Göründüyü kimi Rauf Arifoğlu artıq veteran müsavatçıları da ittiham edir, partiyadan istefa verməsinə səbəb olduğu adamları ləkələməyə çalışır.
Hikmət
