AXCP sədrinin müavini Fuad Qəhrəmanlı Müsavat partiyası Milli Şuranı tərk etməsinin səbəbləri, başqan İsa Qəmbərin tutduğu mövqe ilə bağlı fikirlərini “facebook” səhifəsində bölüşüb. “Hiyə susursan, İsa Qəmbər?!” başlıqlı statusu təqdim edirik:
***
Çox əsəbidilər, qəzəbləniblər. Çünki belə gözləmirdilər. İş üstündə yaxalanıblar. Düşünürdülər ki, biz sadəcə, iqtidarın Müsavatı Milli Şuradan qoparması olayına öz təəssüfümüzü bildirəcəyik, siyasi etika xatirinə də hələ bir yaxşı yol arzulayacağıq. 2005-ci ildə “Azadlıq” blokundan çıxıb gedəndə və bunun qarşılığında parlamentdə 4-5 yerlə mükafatlandırılan zamanlarda biz belə davranmışdıq. Dişləri şirəyə batmışdı, ancaq bu dəfə belə olmadı…
Biz bu olaya münasibət soruşulan ilk andan bütün planları açıb-tökdük, bunun bir iqtidar ssenarisi olduğunu, Milli Şuranı parçalamaqla indidən 2015 seçkilərinə hazırlıq getdiyini, Müsavat rəhbərliyinə 4-5 mandat vəd olunaraq, onların ətrafında “konstruktivlərdən” ibarət, iqtidar bağlantılı, Milli Şuraya alternativ müxalifət bloku qurmaq planlarının olduğunu dedik. Dediklərimiz çox böyük rezonans doğurdu, ziyalılar, demokratik düşərgənin tanınmış isimləri bu xəyanətə görə onları qınadılar. İndi ünvanımıza – AXCP rəhbərliyinə “Yeni Azərbaycan”ın, “Səs”in leksikonu ilə təhqirlər yağdırırlar, bizi “radikal”, “dağıdıcı qüvvə” adlandırırlar. Bu da yetmirmiş kimi, aləmi toz-dumana bulaşdırmaq istəyirlər ki, öz natəmizliklərini gizlətsinlər, insanlar təhqirdən bezib nə baş verdiyi, kimin haqlı olması ilə maraqlanmasınlar. Ancaq alınmayacaq, çünki xalq hər şeyi görür.
Bu proses başlayandan Müsavat başqanı İsa Qəmbər susur, baş verənlərə münasibət bildirməməyə çalışır. Çünki ortalıqda çirkin bir siyasi alver məsələsinin söz konusu olduğunu görüb özünü, reputasiyasını təmiz saxlamağa çalışır. Ancaq bu, mümkün deyil, İsa bəy! Axı biz bu işlərin əvvəlindən bir çox şeyləri bilirik. Məsələn, 2010-cu ildə sizin Bahar Muradova vasitəsilə Oqtay Əsədovla “mənə deputatlıq verin, başqanlıqdan gedirəm, kimi istəyirsiz, başqan olsun” tipli müzakirələr apardığınızdan tutmuş, bir çox şeyləri bilirik. “O zaman alınmadı, eybi yox, bu dəfə alınar” düşünürsünüz bəlkə?! Ancaq çirkab suya girib təmiz çıxmaq mümkün olmadığı kimi, sizin də bu gün baş verənlərdən reputasiyanızı təmiz saxlamaq cəhdiniz alınmayacaq. Çünki iqtidarla mandat bazarlaşmasının başında bu dəfə də siz durursunuz və bu gerçəyi kölgəyə çəkilməklə saxlamaq mümkün deyil!
İsa bəy, niyə danışmırsınız? Milli Şuranı nədən tərk etdiyiniz haqda suallara niyə çıxıb cavab vermirsiniz?
2003-cü ildə sadə müsavatçıları meydanda başsız qoyub 40 gün evinizdən çölə çıxmadınız, 2005-ci ildə mitinqçiləri, Əli Kərimlini, Lalə Şövkəti meydanda qoyub, arxa tərəfdən getdiniz. Hə, indi bunları yada salıb, gərgin məqamlarda ortalıqda görünməmək kimi bir adətinizin olduğunu xatırladım.
İnsanlar axı sizin “Rauf Arifoğluya qarşı çıxanlar mənə qarşı çıxır” dediyinizi də unutmayıblar. İndi həmin Rauf bəy deyir ki, “Əli Kərimlidənsə İlham Əliyevin iqtidar olmasını istəyirəm”. Belə çıxır ki, Rauf bəyin mövqeyini siz də bölüşürsünüz. Çünki özünüzə bu qədər yaxın saydığınız şəxsin fikirlərinə adi münasibət bildirmədiniz. Əslində, bildirib nə deyəsi idiniz ki?! Əli Kərimlini siyasətdən silmək üçün 2000-ci ildə AXCP-də bölünmə baş verərkən iqtidarla birgə hərəkət edib, başqa bir qanadı AXCP kimi tanımaq fikri sizə məxsus deyilmi?
Əslində, Əli Kərimlinin problemi ondadır ki, daim müxalifəti bölüb parçalamaq, intriqalarla diqqəti rejimə qarşı mübarizədən yayındırmaq istəyən bir şəxslə həmişə böyük birlik layihələri gerçəkləşdirməyə çalışıb. Vahid namizəd ideyasına qarşı çıxıb, onu “Şaxta baba” adlandırdığınız vaxtlarda müxalifətin geniş birliyi fikrini sizə ictimai təzyiq yolu ilə qəbul etdirmək üçün Əli bəy nə qədər zəhmət çəkməli oldu… Sonda başqa çıxış yolunuz qalmadığı üçün könülsüz qəbul etdiyiniz bu qərarın icrasında əlinizi “ağdan qaraya” vurmadınız. Milli Şuranın seçki kampaniyası dövründə partiyanız Cəmil bəy üçün nə bir görüş təşkil edə bildi, nə maliyyə yardımlarında bəyənmədiyiniz kiçik partiyalardan fərqləndiniz, nə də ki, müşahidəçilərinizin siyahısını ortaya çıxardınız. Sonda da Milli Şuranın Cəmil bəy səslərin 60-65 faizini toplayıb iddiasına qarşı çıxıb, Məzahir Pənahovun dediklərini təsdiqlədiniz, 200 min səs yığdığını iddia etdiniz. Əvvəl rəqəmlər üst-üstə düşdü, sonra da Milli Şuradan ayrılmaqla yollarınız üst-üstə düşdü.
Yaxşı ki, bütün kartlar açıldı. Yəqin, içində olduğunuz oyunları nəzərdə tutub demişdiniz ki, “bu il bir çox maskalar cırılacaq”. Buyurun, İsa bəy, indi sizin gerçəyinizi hər kəs görür, daha susmağa ehtiyac yoxdur.
Bəlkə də, İsa bəy, insan kimi sizi başa düşmək olar, yaşlanmısınız, Müsavat partiyasının yerli təşkilatlarının əksəriyyəti dağılıb, vaxtilə ətrafınızda olmuş insanların çoxu bu gün sizi tərk edib. İndi ömrünüzün siyasətdən sonrakı dövrləri üçün özünüzə “gün ağlamaq” qayğıları ilə yaşayırsınız. Nə deyə bilərik, siz öz qayğılarınızla yaşayın, Əli Kərimli də ölkəni kriminal iqtidardan azad edib demokratikləşdirmək arzuları ilə…
Ancaq, İsa bəy, susmayın, daha xeyri yoxdur…
Yazı ilə bu linkdə tanış olmaq mümkündü:
https://www.facebook.com/fuad.qehramanli/posts/810734622273433?notif_t=like
