«Azad Avropa» radiosu: «Milli Şura Rüstəm İbrahimbəyovun övladı idi»
Milli Şurada baş verən son olaylara yerli mətbuatla yanaşı beynəlxalq media da diqqət ayrımaqdadır. “Azad Avropa” radiosunun saytında yerləşdirilən “Azərbaycan müxalifətinin birliyi hələ də fəaliyyət qabiliyyətlidirmi?” başlıqlı yazı da bu qəbildəndir. Məqalədə müxalifət koalisiyasında baş verən olaylar barədə ətraflı məlumat verilərək proseslər təhlil olunub.
Yazını qısa ixtisarlarla diqqətinizə çatdırırıq: “Azərbaycan müxalifətinin son illər əldə etdiyi birliklərdən biri Milli Şuranın gələcəyi ilə bağlı bir sıra şübhələr mövcuddur. Bu, Azərbaycanın tanınmış və nüfuzlu partiyalarından biri olan Müsavatın təşkilatın sıralarından ayrılmasından sonra baş verib. Qəbul olunan qərarla bağlı verilən açıqlamalar Milli Şuranı tərk etməni rasional şəkildə izah etmir. Bəyan edilir ki, Milli Şuranın seçkilərdə vahid namizədi müxalifəti qələbəyə aparmadığı üçün ”yeni taktikaya” ehtiyac var. Eyni zamanda iddia olunur ki, Milli Şura yaranma missiyasını yəni seçkilərdə iştirakı yerinə yetirib. Milli Şura hazırda Moskvada yaşayan tanınmış kinorejissor Rüstəm Ibrahimbəyovun övladı idi. O, sərt tənqidləri ilə ölkədəki siyasi mühitə canlanma gətirə bilmişdi. Milli Şura 2013-cü ilin mayında iki aylıq müzakirələrdən sonra 1999-cu ildə o zamankı dövlət başçısı Heydər Əliyevin müşaviri postundan imtina edən Azərbaycan Naminə Forumun prezidenti Eldar Namazov, AXCP sədri Əli Kərimli və Müsavat başqanı Isa Qəmbər arasında aparılan danışıqlar nəticəsində yaranmışdı.
Milli Şuranın hədəfləri
– Demokratik seçkilər yolu ilə avtoritarizmdən demokratiyaya dinc keçidi təmin etmək;
– bu keçid zamanı stabilliyi təmin etmək;
– qanunun aliliyini və insan haqlarını müdafiə etmək;
– Azərbaycanın müstəqilliyini və ərazi bütövlüyünü qorumaq.
Seçkidən sonrakı parçalanma
Noyabrın 28-də Rüstəm Ibrahimbəyov Milli Şuranın sədri vəzifəsindən istefa verdiyini bəyan edərək, bu posta Cəmil Həsənlinin namizədliyini təklif etdi. Cəmil Həsənli bu posta dekabrın 3-də seçildi. Rüstəm Ibrahimbəyov isə Milli Şuranın fəxri sədri elan edildi. Elə həmin sessiyada Eldar Namazov diqqətini rəhbərlik etdiyi “El” Hərəkatının fəaliyyətinə daha çox yönəltməyi planlaşdırdığını bəyan edərək Milli Şuranın Icra Aparatının rəhbəri postundan getdi.
Dekabrın 26-da isə R.Ibrahimbəyov Milli Şuranın fəxri sədri postundan imtina edərək, açıq şəkildə Müsavatı Milli Şuranı dağıtmaqda ittiham etdi.
Prosesləri izləyən müşahidəçilərin sözlərinə görə, əgər Müsavatın Milli Şuranı parçalamaq cəhdləri Isa Qəmbərin Rüstəm Ibrahimbəyovdan incikliyi və ya ona qarşı qısqanclığı ilə bağlı idisə, nəyə görə partiya Rüstəm Ibrahimbəyovu təşkilatda nüfuz sahibi olmayandan sonra belə Milli Şuranı tərk etdi? Və Müsavat 2015-ci il parlament seçkiləri ərəfəsində “yeni taktika”sını elan edərək, Milli Şura ilə əməkdaşlığa hazır olduğunu vurğuladı.
Müsavatın getmə qərarının taktiki səhv olma ehtimalı böyükdür. Bundan isə AXCP-nin bəhrələnməsi şübhəsizdir. “Haqqın.az” saytının məlumatına görə, Müsavat Partiyasının qərarından sonra partiyanın Şəki rayon şöbəsinin üzvləri etiraz əlaməti olaraq Əli Kərimlinin tərəfinə keçiblər.
Cəmil Həsənli Müsavatın qərarını geniş müzakirə etməməyin tərəfdarı olsa da, Əli Kərimli hesab edir ki, Milli Şuranın təssisçiləri Azərbaycan xalqı qarşısındakı öhdəliklərindən imtina etmək hüququnda deyillər. AXCP sədri “facebook” səhifəsindəki stutasunda bu fikirləri bölüşüb: “Biz bu yolu bizimlə birgə addımlamaq istəyənlərlə sona qədər getməyə hazırıq”.
Xəyal
