Cəbhəçi xanımlar keçdikləri yola nəzər saldılar; gələcək vəzifələr müəyyənləşdirildi
AXCP Qadınlar Şurası yaradılmasının 12-ci ilini ötən gün partiya qərargahında qeyd etdi. Xanımlar ənənəvi yığıncaq tədbirlərindən imtina edərək, tədbirlərini daha səmimi ortamda düzənləmişdilər. Partiyanın Bakı şöbələrində təmsil olunan fəallarının iştirakı ilə keçirilən tədbirdə AXCP sədri Əli Kərimli, onun müavinləri də qonaq idi.
Ailə mühiti
AXCP Qadınlar Şurasının sədri Solmaz Hüseynova tədbirdə öncə qısa yaradılış tarixçəsindən danışdı. Bildirdi ki, partiyanın qadınlar qolu əslində, 2000-ci ilin parlament seçkisi ərəfəsində formalaşmağa başlayıb və 2002-ci il yanvarın 12-də yaradılması tamamlanıb, rəsmiləşib. O xatırlatdı ki, Qadınlar Şurasının formalaşdırılması üçün respublikanın ən müxtəlif bölgələrinə səfərlər edilib, bu prosesə mindən artıq xanım cəlb olunub.
Solmaz Hüseynova onu da bildirdi ki, AXCP Qadınlar Şurasının ölkədəki qadın təşkilatları və beynəlxalq qurumlarla da əlaqələri yaradılıb.
“Qadınlar Şurasında haqq-ədalət uğrunda mübarizə aparan xanımlar cəmlənib və bizim üçün çox önəmli, sevindiricidir ki, gözəl ailə mühiti var” deyən Solmaz Hüseynova qarşıda duran vəzifələrdən də söz açdı.
Demokratikləşmənin taleyi həm də qadınlardan asılıdır
Daha sonra AXCP sədri Əli Kərimli cəbhəçi xanımlarla fikirlərini paylaşdı. O bildirdi ki, Azərbaycanın demokratik hərəkatında xanımların rolu həmişə seçilən olub. Buna misal kimi, xalq hərəkatı başlayarkən rus qoşunlarının əhatəsində olmalarına baxmayaraq, xanımların meydanda olmasını göstərdi.
Əli Kərimli yada saldı ki, Azərbaycan Xalq Cümhuriyyəti dünyanın qabaqcıl ölkələrindən daha tez qadınlarımıza seçim hüququ verib: “Bizim qürur mənbəyimizdir ki, Azərbaycandakı Xalq Hərəkatının mənbəyində dayananlar sırasında da xanımlarımız çox olub. Xanımlarımız cəmiyyətdə dövlətin bir hissəsi kimi çıxış ediblər. Mən həmişə cəbhəçi xanımlarla fəxr etmişəm. Çünki onlar əqidəyə sədaqətin simvollarıdılar. Cəbhəçi xanımlar həmişə mübarizənin önündədir, onlar davranışları, intellektlərilə daim cəmiyyətə müsbət nümunələr veriblər”.
AXCP sədri cəbhəçi xanımlardan Gözəl Bayramlı, Elmira Muradəliyeva, Solmaz Hüseynova, Iradə Nəriman, Səadət Cahangirin adlarını çəkərək, bildirdi ki, bu şəxslər artıq bir partiyanın yox, cəmiyyətin lider xanımları statusunu qazanıblar, onlar kimi bir sıra başqa xanım fəallar bütövlükdə millətin qazancıdır.
Bütün müsbət qeydlərindən sonra Əli Kərimli xanımlardan daha fəal təşkilatlanma təmənnası olduğunu da söylədi. AXCP sədri vurğuladı ki, seçicilərin 50 faizindən çoxu xanımdı. Üstəlik, nəzərə alınmalıdır ki, xanımların qardaşlarına, atalarına, yoldaşlarına təsiri böyükdür. Beləliklə, az qala, demokratikləşmənin taleyi qadınların hansı mövqe tutmasından asılıdır: “Ölkənin taleyində Azərbaycan qadının böyük, mühüm rolu var. Istədiyimiz taleyə qoşulmamışıqsa, deməli, hamılıqla xanımlar dəyişimə can atmayıb və bu barədə düşünmək lazımdır. Bu yöndə daxili qərar verilsə, onun qarşısını heç nə ala bilməz. Qarşıda bizi çox həlledici mübarizə mərhələsi gözləyir, ona görə də xanımların yenidən və ciddi şəkildə toparlanmasına ehtiyac var”.
Azərbaycan xanımlarına çağırış
Professor Elmira Muradəliyeva da çıxışında xanımların mübarizədəki rolundan danışdı. Bildirdi ki, uzun illər partiyanın qərargahı olmadan fəaliyyət göstərmək dünya siyasətinin özündə nadir haldır. Çıxışçı Xalq Cəbhəsində gözəl ailə mühitinin olduğunu vurğulayaraq, əldə edilən nailiyyətləri yüksək qiymətləndirsə də, ölkədə demokratik dəyişikliyin baş verməsi üçün xanımların daha artıq səy göstərməsinə ehtiyac duyulduğunu vurğuladı.
AXCP Rəyasət heyətinin üzvü, publisist Səadət Cahangir isə çıxışında dedi ki, ölkəni işsizlik, əsgər ölümləri və bu qəbildən olan ədalətsizliklər başına götürdüyü halda, qadınların evlərinə qapılıb oturması günahdır. O, tarixdə qadınların qəhrəmanlıq nümunələrindən danışdı. Əlavə etdi ki, heç də fəaliyyət üçün keçmişdə indikindən yaxşı şərait olmayıb.
Səadət Cahangir də əminliyin ifadə etdi ki, qadınlar demokratikləşmədə öz missiyalarını çiyinlərinə götürməsələr, ölkənin gələcəyindən xoş danışmaq olmaz. O, hər kəsi təşkilatlanmağa və çevrəni daha da böyütməyə səslədi.
AXCP fəalları Kəmalə Bənənyarlı, Nigar Orucova, Nərmin Xəlil də çıxış edərək, partiyaya hansı səbəbdən qoşulmalarından, qarşıda duran vəzifələrdən danışdılar.
Sonda AXCP sədrinin müavini Gözəl Bayramlı çıxışlarda səslənən fikirləri ümumiləşdirərək dedi ki, qadınların üstün və seçilən rolu olmadan Azərbaycan qarşısında dayanan heç bir ciddi hədəfə çatmaq mümkün deyil. O, xanımları həm özlərinin, həm də ölkənin yaxşı gələcəyi naminə mübarizəyə səslədi.
Natiq
