Ukrayna müxalifəti yanvarın 12-də Kiyevin Müstəqillik meydanında növbəti çoxminlik mitinqini keçirib. Havanın yağışlı olmasına baxmayaraq, meydana 10 mindən çox insan toplaşıb.
Müxalifət liderləri növbə ilə səhnəyə qalxaraq çıxış ediblər. “Berkut” xüsusi təyinatlılarının döydüyü keçmiş daxili işlər naziri Yuri Luçenkonun həyat yoldaşı İrina Luçenko qədim bask şüarını misal çəkərək, sona kimi dayanmağı təklif edib. Müğənni Ruslana isə deyib ki, 50 gün davam edən nümayişlər texnoloqlar üçün yeni informasiyadır.
Ukraynanın digər şəhərlərində də ictimai fəalların və müxalifətin iştirakı ilə “Avromaydan” adı ilə nümayişlər keçirilir. Müxalifət liderləri ölkənin iri müəssisələrinə müraciət edərək bildiriblər ki, Ukrayna hökuməti müxalifətin tələbini yanvarın 21-dək yerinə yetirməsə, yanvarın 24-də tətilə çıxsınlar.
