Əli Orucov: «O, təkcə Tofiq Yaqublunun deyil, prezident İlham Əliyevin də, Ramiz Mehdiyevin də, Ramil Usubovun da, lap elə nehrəmli Hacı İbrahimin də dərdini çəkməkdədir»
AMIP Mərkəzi Şurasının üzvü Əli Orucov “Yeni Müsavat” qəzetinin baş redaktoru Rauf Arifoğlunu ittiham edib. Əli Orucovu hiddətləndirən Rauf Arifoğlunun Müsavat başqanının müavini Tofiq Yaqubluya cavab yazısında Etibar Məmmədovun adını hallandırması olub.
Moderator.az-ın xəbərinə görə Əli Orucov buna cavab olaraq deyib: “Mətbuatdan oxudum ki, Müsavat başqanının həbsdə olan müavini Tofiq Yaqublu partiyasının Milli Şuradan çıxması barədə qərarından üzülüb. Tofiq bəyin də bu üzüntüsünü ”Yeni Müsavat” qəzetinin baş yazarı Rauf Arif oğlu “anlamaq dərdi” ilə qarşılayıb və qəlbinin dərinliklərindən keçənləri qələmə alıb. Etibar Məmmədovun adını da öz ənənəsinə uyğun olaraq çəkib bu yazısında. Lakin görünən o ki, Rauf bəy dərd çəkmirmiş, həm də dərdə düşübmüş. O təkcə Tofiq Yaqublunun deyil (Allah və hakimiyyət tezliklə onun qapısını açsın), prezident Ilham Əliyevin də, Ramiz Mehdiyevin də, Ramil Usubovun da, lap elə nehrəmli Hacı Ibrahimin də dərdini çəkməkdədir. Bu qədər yükü görəsən hörmətli baş yazar necə daşıyır? Atalar demişkən, “Allah da dərdi ”dərd çəkənə” verər”. Sizin də qismətinizə belə yazılıbmış”.
R.Arifoğlunun Müsavat partiyasının başqanı I.Qəmbəri “ölkədə azsaylı strateqlərdən biri kimi qiymətləndirməsi”nə isə Əli Orucov bu cür münasibət bildirib: “Bu barədə Rauf bəyin fikri ilə razıyam. Doğrudan da Azərbaycan müxalifəti daxilində parçalanma və gərginlik yaratmaq, müttəfiqlərini yarı yolda qoymaq, imzasından qaçmaq, eləcə də həmişə korporativ maraqları hər şeydən üstün tutmaq üzrə hörmətli Isa bəy çöx güclü strateqdir. Bunu Rauf bəy deməsə də ölkədə demək olar ki, hamı bilir. Fürsətdən istifadə edərək onu da bəzi şəxslərin diqqətinə çatdırmaq istərdim ki, bizləri bitib-tükənməyən öz münaqişənizə, ”razborkalarınıza” və intriqalarınıza qatmayın. Onsuz da sizlər belə şeylərə öyrəncəlisiniz”.
