Azərbaycanlı iş adamı Dubayın polis «şeflərinə» Türkiyədə «ziyafət» təşkil edibmiş
Ərdoğan «rüşvət əməliyyatı» ilə bağlı Avropaya heyət göndərir
Türkiyədəki «böyük rüşvət əməliyyatında» həbs edilən Azərbaycan əsilli iş adamı Rza Zərrabın adı indi də qadın qalmaqalında hallandırılır. Yerli «Bu gün» qəzetinin yazdığına görə, əməliyyatçılar Zərrabla bağlı izləmə həyata keçirərkən maraqlı məqamlar üzə çıxarıblar. Məlum olub ki, Dubaydakı işlərini yoluna qoymaq (Dubayda bank açmaq) üçün Zərrab bu ölkənin yüksək vəzifəli şəxslərinə rüşvət verib, onların arasında yer alan polis «şeflərini» isə Türkiyəyə dəvət edib. Ötən ilin fevral ayında Dubayın R.M.T.A, M.S.A, A.A.H.T, B.D.M.A və A.B. adlı yüksək vəzifəli polisləri Zərrab və adamları tərəfindən Türkiyə aeroportunda qarşılanaraq Taksimdəki «Divan» otelinə yerləşdiriliblər. Əməliyyatçılar Zərrabla polis rəislərinin aeroportdakı görüşünün şəkillərini də çəkiblər. Əməliyyat qeydləri arasında dubaylı qonaqlar barədə Zərrabla köməkçiləri Abdullah Happani və Rüçhan Bayran arasındakı telefon danışıqları da yer alıb. Bayran qonaqların gəlişini belə təqdim edib: «Bu gün Dubayın polis «şefi» Türkiyəyə gəlir. Mən hava limanında hazırlıq görürəm. Xüsusi bir qarşılama olacaq. Rza bəy və atası da gələcək».
Dubay kralından sonra ikinci adam…
Zərrabla polis rəislərinin birgə toplantısından sonra qonaqlara 15 qadının iştirakı ilə «ziyafət» təşkil olunub. Qadınlara otelin lobisində və barında gözləmək tapşırılıb. Otelə gələn dubaylı qonaqlar da onlar arasından seçim ediblər. Məhkəmənin qərarı ilə həyata keçirilən telefon dinləmələrində qadınların Zərrabın adamlarından olan Yücel Özcil tərəfindən təşkil edildiyi üzə çıxıb. Özcillə Zərrab arasında qadınlarla bağlı söhbət də olub:
Zərrab: İş nə yerdə qaldı?
Özcil: Hər şey hazırdır, Rza bəy. Adamlara (polis rəislərinə) necə deyəcəyik bəs, özlərinin xəbəri var?
Zərrab: Əlbəttə var, özləri istəyib.
Özcil: Onları barda oturdacam, gəlsinlər.
Zərrab: Hamısını bir yerə yığarsan. O ərəbi də təşkil edə bildin?
Özcil: Təşkil etdim, Rza bəy. Dedim, çox vacibdir, Rza bəy son dəfə xahiş etdi. Sən demə, nişanlı imiş, amma evliyəm deyirdi. Dedim, 1500 dollar verəcəm, gəl.
Zərrab: 2000 ver, təki, məmnun qalsın.
Özcil: Oldu.
Zərrab: Düzgün seçmisən?
Özcil: Şəkillərdən tək-tək seçmişəm, bəyənmədiklərimiz geri qayıdacaq. 10 nəfərə yaxın olacaqlar.
Qəzet Özcilin qadınları təşkil edən Aleksi adlı bir xanımla telefon danışıqlarına da yer verib. Söhbət zamanı Özcil Aleksidən qonaqların çox vacib şəxslər olduğunu bildirib: «7-8-ni göndərə bilərsən? Taksimdəki «Divan» otelində saat 11-də. Amma seçilmişlər olsun. Gələnlər çox vacib adamlardır. Nazir səviyyəsində. 5-ni seçəcəklər. Gözünü sevim, çox vacibdir». Vedat adlı şəxslə telefon söhbətində isə Özcil gələnlərdən birinin Dubayda kraldan sonra ikinci adam olduğunu deyib.
AKP: «Hər ay 10 millət vəkili gedəcək»
Qərbdən bir-birinin ardınca gələn tənqid dolu bəyanatlar Ərdoğan hökumətini hərəkətə gətirib. Bəyanatların gəldiyi ilk vaxtlar Avropa Birliyi ilə əlaqələr üzrə yeni nazir Mövlud Çavuşoğlunun dilə ilə
Avropaya «Avropalı dostlarımızı Türkiyənin daxili işləri ilə bağlı olan, həmçinin siyasi çalar daşıyan məsələlər barədə şərh verərkən daha təmkinli olmağa çağırırıq» deməklə «daxili işimizə qarışmayın» ismarıcını verən AKP hökuməti bu mövqeyini dəyişmək məcburiyyətində qalıb. Belə ki, hökumət hər ay Xarici İşlər Nazirliyinin təşkilatçılığı ilə AKP-dən olan 10 millət vəkilini Almaniya, Fransa, İsveçrə və İsveçə göndərəcək. Məqsəd orada yaşayan türk vətəndaşlarını 17 dekabr rüşvət əməliyyatı ilə bağlı məlumatlandırmaq, onların suallarını cavablandırmaqdır. Parlamentdə hakim partiyanı təmsil edən qrupun başqan müavini Mahir Ünal bildirib ki, vəziyyətin bu həddə gəlməsinə istintaq sirrinin mediaya ötürülməsi səbəb olub: «Əslində 17 dekabr əməliyyatında qarışıq heç nə yoxdur. Sadəcə iddiaların mətbuata sızdırılması, insanların etibarına xələl gətirilməsi və bunun üzərindən siyasəti dizayn etmək cəhdləri var. Əslində isə istintaqın gizliliyinə riayət edilməlidir. Yalnız məhkəmənin qərarından sonra insanları günahkar olub-olmadığı üzə çıxır. Burada vəziyyət başqadır. Hələ işin başında ikən məsələ mətbuata ötürülür. Bir sıra iddialar irəli sürərək insanları etibardan salırlar. Gedib xaricdəki vətəndaşlarımıza bütün bunları başa salacağıq».
4 nazir haqda qəfil qərar
Türkiyədə rüşvət və korrupsiya qalmaqalında adları hallanan 4 sabiq nazirin toxunulmazlıqdan məhrum edilərək məsuliyyətə cəlb olunması haqqında dosye hazırlanaraq Ədliyyə Nazirliyinə göndərilib(APA). Keçmiş nazirlər, Ədalət və İnkişaf Partiyasının (AKP) millət vəkilləri Zəfər Çağlayan, Müəmmər Gülər, Egemen Bağış və Ərdoğan Bayraktar haqqında prokurorluğun hazırladığı dosye Ədliyyə Nazirliyi tərəfindən araşdırılır. Ədliyyə naziri Bəkir Bozdağ araşdırma yekunlaşdıqdan sonra dosyenin Böyük Millət Məclisinə göndəriləcəyini açıqlayıb. Qeyd edək ki, AKP parlamentdə çoxluq təşkil edir. Onlar səs verməsə, keçmiş nazirlərin deputatlıqdan məhrum edilərək mühakimə olunması mümkün deyil.
Bacanaq azadlığa çıxdı…
Türkiyənin keçmiş dənizçilik, nəqliyyat və kommunikasiya naziri, hazırda hakim partiyadan İzmir bələdiyyə başqanlığına namizəd olan Binəli Yıldırımın axtarışda olan bacanağı Cəmaləddin Haberdarın polisə təslim olduğu barədə məlumat vermişdik. Yanvarın 10-da o, ifadə vermək üçün İzmir Polis İdarəsinin Qaçaqmalçılıq və mütəşəkkil cinayətkarlığa qarşı mübarizə şöbəsinə getmişdi. Lakin dünən məlum olub ki, C.Haberdar istintaq müddətini azadlıqda keçirəcək. Xatırladaq ki, yanvarın 7-də Türkiyənin İzmir Cümhuriyyət Prokurorluğunun təlimatı əsasında korrupsiya, tenderlərdə qanunsuzluq ittihamı ilə yeni həbslər həyata keçirilmişdi. Əməliyyat çərçivəsində İzmir, İstanbul, Ankara, Van və Hatayda 25 nəfər saxlanılmışdı. Onların arasında Dənizçilik, Nəqliyyat və Kommunikasiya Nazirliyinin tabeliyində olan İzmir və İskəndərun limanlarının rəhbər şəxsləri, eyni nazirliyin Dövlət Dəmir Yolları İdarəsinin sabiq və indiki məmurları, iş adamları da var idi. İş üzrə şübhəli şəxslərdən biri də Cəmaləddin Haberdar idi.
Parlamentdə yumruq davası…
Bu günTürkiyə parlamentində gərgin anlar yaşanıb. Hakimlər və Prokurorlar Ali Şurasının quruluşunu köklü şəkildə dəyişməyi təklif edən qanun layihəsinin parlamentə təqdim olunması müxalifətin etirazı ilə qarşılanıb. Böyük Millət Məclisinin Ədalət komissiyasının iclasında hakim AKP ilə müxalifyönlü CHP arasında mübahisə yaranıb. Keçmiş YARSAV başqanı Ömər Faruk Eminağaoğlu vətəndaş cəmiyyətinin təmsilçisi qismində iclasa qatılaraq söz istəyib. Ona söz verilməməsi CHP-lilərin etirazı ilə qarşılanıb. AKP ilə CHP arasında gərginlik də bundan sonra yaşanıb. Noutbuklar, çantalar havada uçuşurkən Ömər Faruk Eminağaoğlu da millət vəkili Zeyit Aslan tərəfindən yumruqlanıb. Z.Aslan bundan əvvəl də parlamentdə səsləndirdiyi təhqirləri ilə yadda qalmışdı. Həyatında ilk dəfə yumruqlandığını deyən Ömər Faruk Eminağaoğlu baş verənləri «Bu da AKP demokratiyası» deyərək dəyərləndirib.
Gültəkin
