İlkin Rüstəmzadə MDI əleyhinə ifadə verməyə məcbur edilib
Rəsul Cəfərov: «Həmin dövrdə hakimiyyət «xarici qüvvə» axtarışına çıxmışdı və bu axtarış uğursuz oldu»
Yanvarın 9-da Bakı Ağır cinayətlər məhkəməsində NIDA Vətəndaş Hərəkatının 7 üzvü, eləcə də Azad Gənclik Təşkilatından Ilkin Rüstəmzadənin işi üzrə məhkəmə iclası davam etdirilib. Proses zamanı yeni faktlar ortaya çıxdı və məlum oldu ki, Ilkin Rüstəmzadəni MDI rəhbəri Aleks Qriqoriyevlə bağlı yalan məlumat verməyə məcbur ediblər.
Ilkin Rüstəmzadə çıxışı zamanı heç bir iğtişaş törətmədiyini, partlayıcı əldə etmədiyini bildirib və ona qarşı irəli sürülən ittihamları əxlaqsızlıq adlandırıb. Daha sonra Ilkin Rüstəmzadə bunları söyləyib: “Məndən istintaqda tələb edirdilər ki, Aleks Qriqoryevlə bağlı ittiham səsləndirim ki, o cinsi azlıqdır. Məcbur edirdilər deyim ki, guya Aleks Qriqoryev Üzeyir Məmmədliyə ölkədə homoseksuallığın təbliği üçün pul verib. Üzeyir də guya bu videonu çəkdirib. Mən də belə ifadə verməkdən imtina etdim”.
Bu faktlar ölkənin necə idarə olunduğunun, haqsızlığın hansı həddə çatdığının, insanların addımbaşı şərləndiyinin göstəricisidir.
Ilkin Rüstəmzadənin səsləndirdiyi fikirlərə hüquq müdafiəçisi Rəsul Cəfərov da münasibət bildirdi. Rəsul Cəfərov qeyd etdi ki, hakimiyyət gənclərin həbsi dövründə “xarici qüvvə” axatarışına çıxmışdı və bu axtarışları uğursuzluqla nəticələndi: “Gənclərin aksiyasını ilk gündən hakimiyyət ”feysbuk inqilabı” kimi qələmə verməyə çalışdı. “Molotov kokteyli”, “xarici qüvvə” amillərini ortaya atmağa başladılar. Ancaq, açıq-aydın görünürdü ki, baş verənlər yuxarının sifarişidir və istintaq orqanları bu sifarişi yerinə yetirir. Məqsəd onu göstərmək idi ki, guya gənclər kimlərdənsə pul alıb, pozuculuq fəaliyyəti həyata keçirirlər. Amma sonradan ssenari dəyişdi və yeni ittihamlar irəli sürüldü. Görünür, əvvəlki ittihamları sübuta yetirə bilmədilər, cəmiyyət bu ittihamlara inanmadı və buna görə də yeni ssenari quruldu. Sonradan MDI-yə qarşı hücumların kəsilməsi də bunu göstərir ki, bütün deyilənlər əsassız imiş. Həmin vaxt MDI öz mövqeyini bildirmişdi və səslənən fikirlərin yalan olduğunu bəyan etmişdi. Hesab edirəm ki, MDI məhkəmədə səslənən fikirlərə də münasibət bildirməlidir və bu məsələlər daim gündəmdə olmalıdır”.
Hikmət
