40-a yaxın gömrük məmuru və əməkdaşı həbs olundu
Hökumət polis sistemində gizli məlumatlar sisteminin şifrəsini dəyişdi
«Jerusalem Post»: «Korrupsiya skandalı və siyasi basqılar Ərdoğan hakimiyyətinin sonunu gətirə bilər»
Türkiyə Hakim və Prokurorlar Ali Şurasının qərarı ilə İstanbul baş prokurorunun birinci müavini vəzifəsindən kənarlaşdırılaraq Bakırköy prokurorluğuna təyin edilən Zəkəriyyə Özbu gün köhnə iş yeri ilə vidalaşıb. O, İstanbul Prokurorluğunun binasından iş yoldaşlarının müşayiəti və binanın önünə toplaşan insanların alqışları ilə çıxıb. Ayaqüstü cürnalistlərə açıqlama verən prokuror baş verənlərlə bağlı hüquqi yollara baş vuracağını bildirib. Bir gün əvvəl Z.Öz köhnə postundan müvəqqəti uzaqlaşdığını, hətta əşyalarını belə, özü ilə aparmayacağını bildirmişdi.
«Rüşvət əməliyyatı»nı araşdırmağa yeni prokuror gətirildi
Əslində bu qəfil qərarın məqsədi Zəkəriyyə Özü «böyük rüşvət əməliyyatının» araşdırılmasından kənarlaşdırmaq idi. Çünki Öz təhqiqatın aparılmasında prinsipiallığı və dürüstlüyü ilə seçilirdi. Hətta istintaq müddətində İstanbul Polis İdarəsinə gedərək həbs olunan nazir oğlanları və digər tanınmış şəxslərin ifadələrinin, həmçinin onlara veriləcək sualların dəyişdirilməsinə imkan verməmişdi. Məhz bu səbəbdən də Z.Öz AKP hökumətinin qəzəbinə tuş gəldi və prokuror həmkarı Müəmmər Akkaşın aqibətini yaşamalı oldu. M.Akkaş da bir müddət əvvəl istintaq sirrini yaymaq ittihamı ilə işin təhqiqatından kənarlaşdırılmışdı. Əslində isə səbəb Akkaşın rüşvət əməliyyatı çərçivəsində «ikinci həbs dalğasına» qərar verməsi və baş nazir Ərdoğanın oğlu Bilal Ərdoğanı istintaqa dəvət etməsi idi. Lakin Akkaşdan fərqli olaraq Z.Özü təsdiqini tapmayan rüşvət iddialarına görə «zərərsizləşdirdilər». Türkiyə mediasının üzə çıxardığı məlumatlar da Özün Dubay səfəri ilə bağlı ortaya atılan rüşvət ittihamlarının əsassız olduğunu sübut etdi. Üstəlik baş nazir Ərdoğanın adamlarını göndərərək ondan hökumət əleyhinə araşdırmaları dərhal dayandırmağı tələb etməsi və əks halda vəzifəsindən uzaqlaşdırılacağı barədə xəbərdarlığı göstərir ki, Z.Öz məhz prinsipiallığının qurbanı olub. Beləliklə, AKP hökuməti «rüşvət əməliyyatının» istintaqında güzəştsiz mövqeyi ilə fərqlənən hər iki prokurordan qurtulmuş oldu. Yerdə qaldı işi araşdıran digər iki prokuror – Oqtay Ərdoğan və Baş prokuror Turan Çolakkadı. Onların isə «böyük rüşvət əməliyyatını Z.Öz və M.Akkaş kimi tərəfsiz araşdıracağı inandırıcı görünmür. Ən azı ona görə ki, Hakim və Prokurorlar Ali Şurası Zəkəriyyə Öz, Müəmmər Akkaş kimi, onlar barəsində də təhqiqat başladacağını açıqlayanda hökumətin sözçüsü qismində Ədalət naziri Bəkir Bozdağdan şok reaksiya gəlmişdi. Bozdağ heç bir tutarlı əsaslandırma gətirmədən bildirmişdi ki, Çolakkadı və Ərdoğan haqda araşdırmanın aparılmasına icazə verməyəcək.
Yeri gəlmişkən, artıq Zəkəriyyə Özün yerinə təyin olunan prokurorun adı bəlli olub. Bu, Ali Çingiz Hacıosmanoğludur. Onun işlə bağlı hansı mövqeyi tutacağı isə yaxın günlərdə bəlli olacaq.
Hökumət gizli məlumatların şifrəsini dəyişdi
Türkiyə hökuməti daha bir maraqlı qərara imza atıb. Qərara görə bundan sonra polis sistemində istifadə olunan «POL-NET»dən (polis məlumat sistemi) yalnız özəl şifrəni bilən əməkdaşlar istifadə edəcək. Bu sistemdə əməliyyat yazışmaları və xüsusi xidmət orqanlarının gizli məlumatları yer alır. Əvvəllər xüsusi əməliyyatlarda iştirak edən bütün polislərin bu bilgilərlə tanışlıq imkanı vardı. İndi isə onları yalnız razılaşdırılmış əməkdaşlar oxuya biləcək. Göründüyü kimi, bir-birinin ardınca gizli şəkildə həyata keçirilən əməliyyatlar hökumətin gözünü qorxudub. Həm polisləri kütləvi şəkildə işdən çıxarmaqla, həm də bu son qərarı ilə AKP iqtidarının tədbiri əldən vermək istəmədiyini nümayiş etdirir.
İtaliya-Türkiyə-İraq marşrutu üzrə rüşvət
İzmirdən sonra yanvarın 10-da növbəti rüşvət əməliyyatı Mersin Gömrüyündə aparılıb. Əvvəlki iki əməliyyatdan – «böyük rüşvət əməliyyatı» və İzmir əməliyyatından fərqli olaraq bu dəfə baş verənlərdən hökumətin də xəbəri olub. Üstəlik əməliyyatın keçirilməsinə Gömrük və Ticarət naziri Hayati Yazıçı özü göstəriş verib. Əməliyyat zamanı içərilərində 10 gömrük məmurunun da olduğu 35 nəfər rüşvət almaq ittihamı ilə həbs edilib. Rüşvət hallarına İtaliya-Türkiyə-İraq səfərləri zamanı yol verilib. Qeyd edək ki, yanvarın 7-də Türkiyənin İzmir Cümhuriyyət Prokurorluğunun təlimatı əsasında korrupsiya, tenderlərdə qanunsuzluq ittihamı ilə yeni həbslər həyata keçirilmişdi. Əməliyyat çərçivəsində İzmir, İstanbul, Ankara, Van və Hatayda 25 nəfər saxlanılmışdı. Onların arasında Dənizçilik, Nəqliyyat və Kommunikasiya Nazirliyinin tabeliyində olan İzmir və İskəndərun limanlarının rəhbər şəxsləri, eyni nazirliyin Dövlət Dəmir Yolları İdarəsinin sabiq və indiki məmurları, iş adamları da var idi. Polis Dövlət Dəmir Yollarının Ankaradakı Baş İdarəsinin binasında da axtarış aparmışdı. Yeri gəlmişkən, Türkiyənin keçmiş dənizçilik, nəqliyyat və kommunikasiya naziri, hazırda hakim partiyadan İzmir bələdiyyə başqanlığına namizəd olan Binəli Yıldırımın axtarışda olan bacanağı Cəmaləddin Haberdar bu gün polisə təslim olub. O ifadə vermək üçün İzmir Polis İdarəsinin Qaçaqmalçılıq və mütəşəkkil cinayətkarlığa qarşı mübarizə şöbəsinə gedib.
AKP səslərini itirir
Bu arada, Türkiyədə yaşanan son olaylar hakim partiyanın nüfuzuna təsirsiz ötüşməyib. Dünən Türkiyə sorğu mərkəzləri AKP-nin səs faizinin 42%-ə enməsi haqda açıqlama yayıb. Rəy mərkəzləri qeyd edirlər ki, dekabrın 17-də keçirilən rüşvət və korrupsiya əməliyyatı bu səslərin azalmasına həlledici təsir göstərib. Ana müxalifət partiyalarından olan CHP-nin səsləri 29%-ə, MHP-nin səsləri isə 19%-ə yüksəlib.
İsrail mətbuatı «Ərdoğan: başı dərddə olan lider»
Dünya mətbuatı demək olar ki hər gün Türkiyəni silkələyən rüşvət əməliyyatından və bu fonda AKP hökumətinin böyük zərbə altında qalmasından yazır. Növbəti belə məqalə İsrailin «Cerusalem Post» qəzetində işıq üzü görüb. Qəzet Ərdoğanı başı dərddə olan lider kimi təqdim edərək baş nazirin görünməmiş bir siyasi təzyiq altında olduğunu və bu təzyiqlərin onun hakimiyyətinə son verə biləcəyini yazıb: «Qarşıdakı seçkilər onun üçün təkcə nüfuz yarışması yox, həm də Türkiyənin ruhu üçün bir mücadilə olacaq. AKP-nin xarizmatik lideri önəmli bir korrupsiya skandalı içindədir. Bu skandal və siyasi basqılar onun hakimiyyətinin sonunu gətirə bilər».
Gültəkin
