Müavinlərin “facebook” debatı
Fuad Qəhrəmanlı Müsavatı müttəfiqliyə xilaf çıxmaqda qınadı; Arif Hacılı onu “yalançılıqda” suçladı; AXCP-nin sədr müavini ona cavab verdi
Müsavat Partiyasının Milli Şuradan ayrılması cəmiyyətdə geniş müzakirəyə səbəb olub. Partiya bu mövzuya birtərəfli qaydada moratorium qoyduğunu bəyan etsə də, müzakirələr səngimir. Üstəlik, moratorium bəyanatının özü də qeyri-səmimilik kimi qiymətləndirilir.
AXCP sədrinin müavini Fuad Qəhrəmanlı hesab edir ki, Müsavat bu yolla Milli Şuradan çıxmaq qərarı ilə bağlı suallardan yayınmaq istəyir: “Müsavat funksionerləri Milli Şuradan ayrılmaq barədə qərardan sonra çalışdılar ki, tutarsız arqumentlərlə öz mövqelərini əsaslandırsınlar. Ancaq bu, cəmiyyətdə əks-reaksiya yaratdı və Müsavat Partiyasına qarşı yönəlmiş ictimai qınaqlar daha da artdı. Milli Şuranın üzvləri, ziyalılar Müsavatı açıq şəkildə qınadılar. Aydın oldu ki, Müsavat öz mövqeyini əsaslandıra bilmir, danışdıqca daha da çətin vəziyyətə düşür. Bundan sonra birtərəfli moratorium qəbul etdiklərini, bu polemikalarda iştirak etməyəcəklərini bildirdilər. Polemikada iştirak etmək nə zamandan qəbahət sayılıb? Əksinə polemika imkan verir ki, tərəflər mövqelərini daha aydın, daha doğru izah etsinlər”.
Cəmiyyətin Müsavatdan Milli Şuranı nəyə görə tərk etməsinə tutarlı izahat gözlədiyini qeyd edən AXCP funksioneri bu partiyanın üzərinə götürdüyü öhdəliyi pozduğunu deyib: “Müsavatın qərarında deyilir ki, Milli Şuranı müvəqqəti seçki bloku olduğu üçün tərk ediblər. Ancaq Milli Şuranın təsis bəyannaməsində onun avtoritarizmdən demokratiyaya keçidi təmin edəcək bir qurum olduğu və davamlı fəaliyyət göstərəcəyi ifadə olunub. Müsavat Partiyası da bu bəyannamə ilə üzərinə öhdəlik götürüb. İndi bu öhdəliyi pozub, Milli Şura çərçivəsindəki müttəfiqlərini buraxıb, meydanı tərk edib, siyasi kursunu dəyişibsə, bunun inandırıcı cavabı verilməlidir”.
Fuad Qəhrəmanlı eyni zamanda Müsavat Divanının üzvü İkram İsrafilin onu debata çağırmasına da münasibət bildirib. İ.İsrafil mətbuata açıqlamasında Müsavatın qərarı ilə bağlı müzakirə üçün F.Qəhrəmanlı ilə debata hazır olduğunu deyib. Müavat funksionerinin bu çağırışına F.Qəhrəmanlı belə cavab verib: «İkram İsrafil bu məsələlərdə mənimlə polemikaya girə biləcək şəxs deyil. İkram İsrafilin nə statusu, nə də səviyyəsi ona uyğun deyil ki, mənimlə debat aparsın. Əgər Müsavatın bu məsələ ilə bağlı bizimlə debat istəyi varsa, o partiyada mənimlə eyni statusda olan Arif Hacılı ilə istənilən mətbu orqanında debata hazıram».
***
Fuad Qəhrəmanlının açıqlamasına Arif Hacılı facebook səhifəsində münasibət bildirib. O, “4 cümlədə 5 yalan” başlığı ilə Müsavatın Milli Şuradan çıxmaqla öhdəliyini pozduğu iddiasına cavab verib. A.Hacılının fikrincə, F.Qəhrəmanlının bu barədə dediklərində 5 yalan var. Belə ki:
“1. Müsavat Milli Şuranı yalnız bu qurumun prezident seçkiləri ilə bağlı yarandığını əsas götürərək tərk etməyib. Müsavatın Milli Şuranı tərk etməsi barədə bəyanatında bütün səbəblər aydın şəkildə sadalanıb. Müsavtın bəyanatından mətndə sitat gətirilən cümlə isə bəyanatda sadəcə olaraq yoxdur.
2. Milli Şura üzvləri hər hansı bəyənnaməni imzalamayıb. Milli Şuranın yaradılması haqqında sənəd hətta Rüstəm İbrahimbəyov tərəfindən imzalanmamışdı. Həmin iclasa sədrlik edən Mirmahmud Mirəlioğlu bunu xüsusi qeyd etdi.
3. Müsavat partiyası Milli Şura qarşısında hər hansı öhdəlik götürməyib, götürə də bilməzdi. Çünki Milli Şura partiyaların yox, fərdlərin birliyi(dir) idi.
4. Müsavat partiyası siyasi kursunu dəyişməyib. Hansısa dəyişiklik olacaqsa, bu da rejimə qarşı mübarizənin sərtləşməsi istiqamətində olacaq.
5. Müsavat mübarizə meydanını tərk etməyib. Əksinə mübarizəsində əl-ayağa dolaşanlardan azad olub real mübarizə barədə qərar verib.
***
A.Hacılının F.Qəhrəmanlını yalan söyləməkdə ittiham etməsinə cavab özünü çox gözlətməyib. Müsavatın İcra Aparatı rəhbərinin qeydlərindən bir qədər sonra AXCP sədrinin müavini öz facebook hesabından ona cavab verib:
“Arif Hacılı mətbuatda getmiş fikirlərimi təhlil edərək, məni 5 yalan danışmaqda ittiham edib. Mən də onun bu iddalarınına aydınlıq gətirmək qərarına gəldim.
1. Arif bəyin dediklərindən belə çıxır ki, ya Müsavat Divanının qəraraını oxumayıb, ya da məqsədli şəkildə yalan danışır. Müsavat Divanının Milli Şuradan çıxmaqla bağlı qərarının son, nəticə hissəsində göstərilir ki, MŞ prezident seçkiləri ilə əlaqədar yaranmış qurum olduğu üçün Müsavat partiyası bu qurumda fəaliyyətini dayandırır. Açıq-aydın Müsavatın addımı MŞ-nın prezident seçkisi ilə bağlı yaradılmış qurum olması ilə əsaslandırılır. Mən də bildirmişəm ki, MŞ-nın təsis bəyannaməsində bu qurumun prezident seçkiləri ilə bağlı deyil, avtoritarizmdən demokratiyaya keçid üçün yaradıldığı bildirilir. Kim yalan danışır – Arif bəy, yoxsa mən?
2. Arif bəy iddia edir ki, MŞ üzvləri qurumun təsis bəyannaməsini imzalamayıblar. Bunu mənim Müsavatın imzaladığı təsis bəyannaməsini pozması fikrimə qarşı deyir. Arif bəyin məntiqindən belə çıxır ki, Müsavat bu bəyannaməni ona görə pozub ki, ona yalnız səs verib, imzalasaydı pozmazdı. Bu nə yanaşmadır? Nə fərqi var, bir siyasi partiya nümayəndələri sənədə əl qaldırıb səs verdilər, ya onu imzaladılar. Hər iki halda bu sənəd öhdəlik yaratdığı üçün onu pozmaq etik deyil. Bu baxımdan Arif bəyin Müsavat üzvlərinin də səs verdiyi sənədi pozmalarına haqq qazandırması məncə, siyasi etikaya uyğun deyil.
3. Arif bəy idda edir ki, mən Müsavat partiyasının MŞ qarşsında götürdüyü öhdəliyi pozduğunu deyərkən, doğru danışmamışam. Fikrini də onunla əsaslandırır ki, MŞ partiyaların deyil, fərdlərin birliyidir. O zaman sual yaranır: bəs necə olur ki, MŞ-dakı müsavatçıların fəaliyyəti partiya üzvlərinin şəxsi qərarı ilə deyil, partiya Divanının qərarı ilə dayandırılır? MŞ-dakı müsavatçıların Müsavat partiyasını təmsil etməsini və Müsavatın onlar vasitəsi ilə bu qurumda iştirak etdiyini necə inkar etmək olar? Arif bəy MŞ yaranarkən uzun müddət partiyalar arsında təmsilçilik kvotası ilə bağlı müzakirələrin getdiyini də bilə-bilə bu qurumda partiya təmsilçiliyini inkar edərək həqiqəti təhrif edir .
4. Arif bəy mənim Müsavatın siyasi kursunu dəyişməsi ilə bağlı fikirlərimi də inkar edir. Bunu təkcə mən idda etmirəm axı. Müsavat partiyasının MŞ-dan ayrılmasına siyasi dəstək verən “Yeni Müsavat” qəzeti də iddia edir. Baxın, “Yeni Müsavat” qəzeti “Müsavat təkbaşına iqtidar olmaq yürüşünə start verdi” adlı məqaləsində Müsavatın MŞ-dan ayrılması ilə bağlı yazır: “Müsavat başqanı həm də görür ki, Əli Kərimli ilə hakimiyyətə gəlmək mümkün deyil; bunun səbəbi çoxdur; … aşırı radikallıq, nifrət, aqressiya insanlarda narahatlıq və qorxu yaradır.” Demək “Yeni Müsavat” qəzeti bizdən də əvvəl etiraf edir ki, Müsavat Əli Kərimlinin, onunla bərabər Cəmil Həsənlinin, demək, həm də Milli Şuranın sadalanan epitetlərlə xarakterizə olunan siyasi kursundan fərqli siyasət yürütməyə qərar verib. Arif bəy də daxil olmaqla heç bir Müsavat rəsmisinin bu fikirlərə etiraz etməməsi siyasi kurs dəyişikliyini təsdiq etmirmi? Müxalifətin fəaliyyətinə bu cür münasibət daha çox iqtidar təmsilçilərinin baxışları ilə üst-üstə düşmürmü? Digər tərəfdən, hazırkı iqtidarın son seçkilərdə beynəlxalq səviyyədə legitimliyini sarsıdan bir güc mərkəzini – demoikratik qüvvələrin birliyini tərk etmək, başlanmış işləri yarıda buraxmaq kurs dəyişikliyi ilə bağlı deyilsə, bəs nə ilə əlaqədardır? Arif bəy bu gerçəkliyi inkar edə bilmirsə, bizi niyə suçlayır, aydın deyil.
5. Arif bəy mənim “Müsavat müttəfiqlərini buraxıb, meydanı tərk edib” fikrimə qarşı idda edir ki, əksinə, Müsavat “əl-ayağa dolaşanlardan azad olub”, meydanı da tərk etməyib. Maraqlıdır, Müsavat Milli Şuradakı müttəfiqlik, birgə əməkdaşlıq imkanlarından imtina edib qurumu tərk edirsə, bu hərəkətin adı nədir? MŞ-da birgə mübarizə apardığı tərfdaşlarını meydanda yarı yolda buraxıb getməkdir, yoxsa “əl-ayağa dolaşanlardan azad olmaqdır”? Belə çıxır ki, prezident seçkiləri kampaniyası gedişində Müsavat partiyası Cəmil Həsənli də daxil olmaqla, MŞ üzvlərinə tərfdaş, mübarizə yoldaşı kimi yox, əl-ayağına dolaşan şəxslər kimi baxıb. Bəlkə Arif bəy onu nəzərdə tutur ki, 2013-cü ilin əvvəlindən Müsavat başqanı vahid namizədi Şaxta baba adlandırıb, müxalifətin geniş birliyi ideyasına qarşı çıxanda məhz Əli Kərimli onlara ictimai rəyin gücü ilə bu ideyanı qəbul etdirərkən, Rüstəm İbrahimbəyov Milli Şuranı yaradarkən və Cəmil Həsənli seçkidə rejimə qarşı kəskin ritorika ilə tənqid səsləndirərkən onun və onunla birgə olanların qəlbində saxladığı fikirlərin gerçəkləşməsinə mane olub, əl-ayağa dolaşıb. Buna görəmi Arif bəy seçkilər vaxtı, seçki qərargahının rəhbəri olsa da, Müsavatın heç bir dairədə müşahidəçilərinin siyahısını ortalığa çıxara bilmədi, təmsil etdiyi partiya Cəmil Həsənlinin bir görüşünü belə təşkil etmədi və ya edə bilmədi, əksinə, bütün görüşlərin təşkilatçısı olan AXCP-nin bir sıra rayonlardakı görüş qrafikini müxtəlif bəhanələrlə təxirə saldırdı?..
Bütün bunları bilə -bilə Arif bəyin yalanla məni yalançı çıxarmağına heç təəcüblənmədim də”.
Xəyal
