Elmar Brok: «Polis və prokurorların vəzifədən uzaqlaşdırılması Türkiyədə məhkəmənin müstəqil olmadığını göstərdi»
Aleksandr Lambsdorff: «Ərdoğan demokratiya ilə maraqlanmayan ərəb dünyasını nümunə götürməməlidir»
Qərbdən Ərdoğan hökumətinə tənqidlər gəlməkdə davam edir. Avropa Birliyinin ardınca bu dəfə də Avropa Parlamenti Türkiyədə baş verən son olaylardan narahatlığını ifadə edib. Qurumun Xarici Əlaqələr Komissiyasının rəhbəri Elmar Brok hökuməti və baş nazir Ərdoğanı açıq tənqid edən bəyanat səsləndirib. Brok bildirib ki, Ərdoğan hökumətinin qarışdığı rüşvət-korrupsiya iddialarını araşdıran polis və prokurorların vəzifədən uzaqlaşdırılması Türkiyədə məhkəmə sisteminin müstəqil olmadığını açıq şəkildə ortaya qoyur.
Avropa Parlamentində liberallar qanadının əsas təmsilçilərindən olan Aleksandr Qraf Lambsdorff da «Türkiyə Avropadan çox uzaqlaşdı. Ölkənin siyasi kursu mübahisəli vəziyyətdədir» bəyanatını verib. Lambsdorff bildirib ki, Ərdoğan ərəb dünyasını nümunə götürməməlidir. Çünki orada demokratiyanın təməl prinsipləri ilə maraqlanmırlar.
Avropa Parlamentinin Türkiyə üzrə hesabat hazırlayan nümayəndəsi Ria Oomen Ruijtendən də maraqlı açıqlama gəlib. Ruijten bildirib ki, Türkiyə ilə bağlı hesabata ölkədə 17 dekabrdan sonra baş verən məlum olaylar da daxil ediləcək. Hesabatın bu ilin fevral ayında Avroparlamentdə baxılaraq qəbul edilməsi gözlənilir.
Sənədin tövsiyələr hissəsində aşağıdakı irad və təkliflər yer alacaq:
– Rüşvət və korrupsiya əməliyyatı çərçivəsində araşdırmalar tərəfsiz və müstəqil qurumlar tərəfindən həyata keçirilməli, iddiaların müstəqil məhkəmədə obyektiv şəkildə araşdırılması təmin edilməlidir.
– İddialar ayrıseçkilik edilmədən şəffaf və tərəfsiz şəkildə araşdırılmalıdır.
– Bir-birinin ardınca çox sayda polisin işdən çıxarılması, onların yerinə başqalarının təyin olunması məhkəmələrin müstəqilliyi, tərəfsizliyi və hüquqi mərhələnin sağlam başa vurulacağı ilə bağlı dərin şübhələr yaradır.
– Türkiyə hüquq sistemində islahatlara getməlidir. Yaşananlar Türkiyədə məhkəmənin sadəcə sözdə müstəqil olduğunu ortaya qoydu.
Gültəkin
