Üzeyir Məmmədli
Müsavat partiyası, nəhayət, gözlənilən qərarı verdi və Milli Şuranı tərk etdi. Seçkilərdən sonra Müsavat partiyası funksionerlərinin açıqlamalarından bu aydın idi. Sadəcə, nə vaxt olacağı məlum deyildi.
Ancaq Müsavat partiyasına təkcə Milli Şuradan çıxmaq lazım deyildi, bir sıra başqa addımlar da atılmalı idi. Müsavatın seçkisonrası fəaliyyəti nəticəsində Rüstəm İbrahimbəyov Milli Şuradan demək olar ki, uzaqlaşdı. Eldar Namazov İcra Aparatından istefa verdi. İndi faktiki olaraq, Milli Şura Müsavatın əzəli rəqibi AXCP üzərində yük olaraq qalıb. Müsavat təkcə Milli Şuranı tərk etmədi, o həm də Milli Şuranı tar-mar edərək, AXCP-nin üzərinə yüklədi.
Əslində Müsavatın başqa şansı da yox idi. Milli Şuranın yaranması, əvvəl Rüstəm İbrahimbəyovun, daha sonra Cəmil Həsənlinin ulduzunun parlaması müxalifətin 20 ildir ən böyük ulduzu olan İsa Qəmbərin kölgədə qalmasına və siyasi karyerasının bitməsi təhlükəsinin yaranmasına gətirib çıxarmışdı. Hələ üstəlik, Müsavatın düyünə düşmüş qurultay məsələsi var və bu qurultayda İsa Qəmbər başqanlıqdan getməlidir.
Seçkisonrası həmlələri ilə İsa Qəmbər hələlik təhlükəni sovuşdurdu, AXCP-yə yenə zərbə vurdu. Ancaq İsa Qəmbər müxalifətin yenə bir nömrəli ulduzuna çevrilə biləcəkmi? Bunu zaman göstərəcək.
Cəbhəçilərə sözüm budur ki, “hakimiyyətə işləyir” ittihamı ilə Müsavatın üzərinə getməsinlər. Çünki bunun doğru olmadığını gözəl bilirsiz. Bu mövqenin sizə uğur gətirməyəcəyini də yaxşı bilirsiz. AXCP son illər təşkilatlanma baxımından xeyli gözəl addımlar atıb. Xüsusilə gənclər təşkilatı fərqlənir. Bu istiqamətdə davam etmək lazımdır.
İsa bəyə isə sözüm budur ki, müxalifətdaxili qələbələr qazanmaqdan yorulmadınızmı, bəy?! Bizə hakimiyyət üzərində qələbələr lazımdır.
Və sonda artıq tarix olmaq üzrə olan Milli Şuranın və ümumilikdə 2013 seçki kampaniyasının hakimiyyətə qarşı mübarizəyə vurduğu zərbədən danışmaq istəyirəm. Bu zərbə artıq bizim ziyalı kartımızın da əlimizdən alınmasıdır. Əvvəlki illərdə hamı deyirdi ki, ziyalılar prosesə qatılmalıdır. Onlar qatılsa, dəyişiklik olacaq, proses rənglənəcək. 2013-cü ildə proses həqiqətən rəngli oldu. Ancaq nəticədə artıq ziyalı kartından da istifadə edib tarixin zibilliyinə atmaq üzrəyik. Bu kartı belə xərcləməməli idik. Milli Şuranın irəliyə addım olduğunu deyənlər yanılırlar. Cəsarət edib deyirəm ki, bu artıq avantüra görüntüsü yaradır və tarixdə də bu cür qalacaq. Ancaq ümumilikdə 2013-cü ili uğursuz adlandırmaq olmaz. Çünki proses inkişaf edir və qarşısıalınmazdır. 2013 prosesi bizə Cəmil Həsənli kimi bir lider bəxş etdi! Bütün ölkənin rəğbətini qazanan bir lider oldu Cəmil bəy! Ümid edirəm ki, Milli Şuranın aqibətinə baxmayaraq, Cəmil bəy yoluna davam edəcək. Gənclər olaraq, onun yanında yer almağa həmişə hazırıq!
Baki Ağır Cinayətlər Məhkəməsi
08.01.2014
