Gəncə Şəhər Icra Hakimiyyətindən yayılan məlumatlara reaksiya gəldi
Gəncənin icra başçısı Elmar Vəliyevin tutduğu vəzifədən uzaqlaşdırılacağı barədə məlumat yayılıb. “Bizim Yol” qəzetinin yaydığı həmin məlumatda qeyd olunur ki, onun təyinatından sonra Gəncənin abadlaşdırılması kampaniyasına başlansa da, bu proses hakimiyyətin əleyhinə böyük narazılıq dalğasına çevirib, kütləvi söküntülər yerli əhalinin qəzəbinə səbəb olub.
Həmçinin seçki ərəfəsində Gəncədə yeni obyektlərin, müəssisələrin, parkların açılışı planlaşdırılsa da işlərin qrafik üzrə getməməsi səbəbindən tədbirlər baş tutmayıb. Nəticədə ölkə başçısı Ilham Əliyev Qərb bölgəsində səfərdə olsa da, Gəncəyə baş çəkməyib, yeni obyektlər digər dövlət məmurlarının iştirakı ilə açılıb.
Bütün bunlar və Elmar Vəliyevin bu ərəfədə məzuniyyətdə olması onun işdən çıxarılacağı qənaətini yaradıb.
Lakin Gəncə Icra Hakimiyyətinin baş məsləhətçisi Kənan Məmmədov deyilənləri təkzib edib. O, “Bizim Yol” qəzetinə göndərdiyi məktubda bildirib ki, Gəncə şəhərində həyata keçirilən bütün abadlıq-quruculuq işləri bütün əhalinin razılığına səbəb olub. Kənan Məmmədov həmçinin əlavə edib ki, Elmar Vəliyev məzuniyyətdə deyil: “Elmar Vəliyev hal-hazırda məzuniyyətdə deyil iş başındadır”.
