Cəmil Həsənli Milli Şura ətrafında baş verənlərə aydınlıq gətirdi VİDEO
“Əgər siyahı cəbhənin diqtəsi ilə hazırlanıbsa, o zaman onlara heç olmasa bir yer artıq düşməli idi”
Milli Şuranın sədri Cəmil Həsənli “Azadlıq” radiosunun “İşdən sonra” verilişinin qonağı olub. Cəmil Həsənli verilişdə Müsavat Partiyasının Milli Şuradan çıxması və ümumiyyətlə bu qurumun taleyi ilə bağlı sualları cavablandırıb.
Mütləq mənada böyük çoxluq davama tərəfdardır
Cəmil Həsənli Müsavat Partiyasının Milli Şuradan çıxmasından sonra bu qurumun fəaliyyətini davam etdirib-etdirməyəcəyi barədə danışarkən bildirib ki, mütləq çoxluq davam etməyin tərəfdarıdır:
“Davam etməyin tərəfdarları daha çoxdur. Böyük əksəriyyət davam etməyə qərarlıdır. Müzakirələr də bu istiqamətdə gedir. Amma bütün hallarda bu həftənin sonuna sessiya çağıracağıq və bütövlükdə vəziyyəti dəyərləndirəcəyik. Partiya və hərəkat sədrləri, gənclər təşkilatları, ziyalalırla görüşmələrimiz olub. Deyə bilərəm ki, Milli Şuranın saxlanması, güclənməsi və proseslərə təkan verən bir qurum kimi fəaliyyətini davam etdirməsinə daha çox meyl edənlər var. Hadir hallarda görürəm ki, müəyyən tərəddüdlər var. Mütləq mənada böyük çoxluq davama tərəfdardır”.
Müsavat Partiyasının Milli Şuradan çıxmasına gəlincə, Cəmil Həsənli bildirib ki, bu partiya quruma öz qərarı daxil olub, öz qərarı ilə də çıxıb. Milli Şura sədri əlavə edib ki, rəhbərlik etdiyi qurum partiya və hərəkatların azad, demokratik birliyidir: “Heç kim Milli Şuraya məcburi gətirilməyib və heç kəs orda məcburi saxlanıla bilməz”.
Biz bəhanələri aradan götürdük
Cəmil Həsənli Müsavat Partiyasının Milli Şuradan çıxması ilə bağlı gətirdiyi arqumentlərə də toxunarkən bildirib:
“Məsələləri necə var elə də dəyərləndirmək lazımdır. Özümüzə bəraət qazandırmaq üçün məsələlərə əlavə rəng qatmayaq.
Müsavat Partiyasını seçkidən sonrakı dövrdə Milli Şura ilə bağlı narahat edən bir sıra məsələlər var idi. Və biz o məsələlərin böyük bir hissəsini həll etdik. Bunlardan biri Rüstəm İbrahimbəyovla bağlı idi. O Rüstəm İbrahimbəyov ki, onun Milli Şuranın sədri postuna, həmçinin prezidentliyə namizədliyini İsa Qəmbər təklif etmişdi. Lakin seçkidən sonra Müsavatda belə yanaşma var idi ki, Rüstəm İbrahimbəyov Bakıya gələ bilmir və o sədrlikdən getməli, bu posta Cəmil Həsənli gəlməlidir. Rüstəm İbrahimbəyov müşahidə qabiliyyəti iti olan adamdır. Əlbəttə ki, mətbuatda gedən yazıları müşahidə edirdi. Görünür, bu tendensiyaları özü də qiymətləndirdi və təklif etdi ki, sizin namizədlik statusunuz başa çatdı. Bəlkə sədr siz olasınız? Rüstəm bəyə böyük hörmətim var. Ona görə də bildirdim ki, bəlkə həmsədrlik qaydasında işləyək? O, buna razılaşdı. Amma bu məsələ gündəmə gələndən sonra Müsavat Partiyası bunun əleyhinə oldu, “Yeni Müsavat”da bir sıra yazılar getdi. Buna görə də Rüstəm İbrahimbəyov həmsədrlikdən də imtina etdi.
Mən hesab edirəm ki, Rüstəm İbrahimbəyovla bağlı qoyulan məsələnin obyektiv əsası yoxdur. Bunlar bəhanə idi və biz bunu aradan götürdük. Daha doğrusu Rüstəm İbrahimbəyov götürdü. Çünki onun üçün prinspial məsələ Milli Şuranın taleyidir”.
Nə fərqi var, qələm tutan əlinlə səs vermisən də
Cəmil Həsənli daha sonra Milli Şuranın hədəflərinin bəlli olmaması barədə səsləndirilən iddialara toxunub:
“Milli Şura yarananda iki mühüm sənəd qəbul edilib. Onlardan biri siyasi bəyannamə, digəri isə memorandumdur. Hər iki sənəddə Milli Şuranın məqsəd və məramları, hədəfləri orda əks olunub. Gülağa Aslanlı deyir ki, biz həmin sənədlərə imza atmamışıq. Hə fərqi var, qələm tutan əlinlə səs vermisən də. Səsvermə ilə qəbul edilən sənədin mahiyyətini şübhə altına almaq olmaz”.
Milli Şura sədri qurumun effektiv idarəetmə mexanizminin olmaması barədə iradları bölüşdüyünü deyib. Lakin əlavə edib ki, bunun obyektiv səbəbləri var:
“Seçkidən bir müddət sonra sədr postunda dəyişiklik baş verdi. Mən sədr olmaya-olmaya bu dəyişiklikləri necə edə bilərdim. Bu problemin həlli sədr seçkisindən sonra başladım. Təşkilati məsələlərdə müəyyən çətinliklər var idi. Çətinlik ondan ibarət idi ki, biz Milli Şuraya daxil olan partiyaların, hərəkatların, gənclər təşkilatlarının bərabər təmsil olunmasını istəyirdik. Əlbəttə mən qəbul edirəm ki, Milli Şuraya daxil olan bütün partiyalar eyni gücdə deyil. Amma mən partiyaların hamısına eyni dərəcədə hörmət edirəm. Biz sədr aparatını formalaşdırdıq. Sədr aparatına Şahvələd Çobanoğlu, Oqtay Gülalıyev, Ülvi Həsənli və Yeganə Hacıyeva daxildi. Amma bu ilkin addım idi, sədr aparatının tamamlanması demək deyildi. İkinci məsələ Məşvərət Məclisinin formalaşdırılması idi. Mənə məlum idi ki, bununla bağlı hələ Tiflisdə İsa Qəmbər, Eldar Hamazov və digərləri ilə müzakirələr aparılmışdı. Həmin müzakirələrin nəticəsində belə razılıq əldə olunmuşdu ki, Məşvərət Məclisi partiya, hərəkat və komissiya sədrlərindən formalaşdırılsın. Bu məsələ sessiyanın səlahiyyətindədir. Və ötən sessiyada mənə tapşırıq verilsin ki, təkliflər hazırlayım. Mən də bu təklifləri hazırlayıb tanış olmaq üçün İsa Qəmbərə, Əli Kərimliyə və Eldar Hamazova göndərdim. Digərləri ilə isə bu barədə telefonla danışıb razılıq əldə etmişdim. Və mənim partiya sədrlərinə göndərdiyim təkliflər səhəri gün “Yeni Müsavat”da dərc olundu. Məlumat verdilər ki, gizli siyahı tərtib olunub. Bunun nəyi gizlidir ki, mən bu təklifləri partiya sədrlərinə göndərmişəm. Bunun nəyi gizlidir ki, 15 nəfərin iştirakı ilə Müsavat Partiyasının qərargahında keçirilən görüşdə bunu demişəm”.
Cəmil Həsənli Məşvərət Məclisinin AXCP-nin dominantlığı ilə formalaşdırılması barədə deyilənlərə də aydınlıq gətirib.
“Bizim nəzərdə tutduğumuz modeldə Müsavatdan, AXCP-dən, EL-dən, ACP-dən və gənclər təşkilatlarından iki nəfərin təmsil olunması təklif edilirdi. Yalnız KXCP-dən bir nəfər idi. Onu da kompensasiya etməyi planlaşdırmışdım. AXCP-dən Əli Kərimli və Kamil Vəli Hərimanoğlunun təmsil olunması təklif edilirdi. Kamil Vəli il ərzində Azərbaycanda olmur. Digər tərəfdən onun missiyasi o boydadır ki, ona cəbhəçi kimi baxmaq olmaz. İndi deyin, burada hardadı dominantlıq? Əgər siyahı cəbhənin diqtəsi ilə hazırlanıbsa, o zaman onlara heç olmasa bir yer artıq düşməli idi”.
