Hacıbaba Əzimov və İbrahim İbrahimlidən Məryəm Həsənovanın müraciətinə dəstək
Hazırkı hakimiyyətin Azərbaycanın müstəqillik qazanmasında böyük rolu olanlara qarşı ögey münasibəti, torpaqlarımızı müdafiə edənlərə sayqısız yanaşması göz önündədir. Hakimiyyətin 1991-1995-ci illərdə fəaliyyət göstərən Milli Məclisin üzvü olan istiqlalçı deputatlara sayqısız münasibətini istiqlalçı deputat Məryəm Həsənovanın qəzetimizdə dərc olunan yazısı da təsdiq edir. M.Həsənova qanunla sabiq deputatlar üçün müəyyən olunmuş pensiya hüququ pozulduğuna görə məhkəməyə müraciət edib. Lakin bir ilə yaxın müddət keçməsinə baxmayaraq məhkəmə işin icraatını başa çatdırmayıb. Hüquqlarının bərpası uğrunda haqsızlıqlarla üzləşən M.Həsənova dövlət başçısı İlham Əliyevə etiraz məktubu göndərib. Məktubda M.Həsənova istiqlalçı deputatlara ögey münasibətin müqabilində vaxtilə Azərbaycanın dövlət müstəqillinə qarşı çıxış edənlərin indi yüksək imtiyazlı pensiya ilə təmin olunduğunu vurğulayıb. M.Həsənova qeyd edib ki, həmin üz qarası deputatların bəziləri hazırda hətta yüksək dövlət məmuru və deputat kürsülərində oturublar. Bəs, 1991-ci il martın 7-də Ali Sovetdə SSRİ-nin saxlanması ilə bağlı referendum keçirilməsi əleyhinə, Azərbaycanın müstəqilliyinə səs vermiş 43 istiqlalçı deputata bu cür yanaşma nəyin təzahürüdür?
Hacıbaba Əzimov: «Müstəqilliyinin əldə olunmasında xidmətləri olanlara qarşı diskriminasiya dövlətin siyasətidir»
VAMBP sədri, professor, istiqlalçı deputat Hacıbaba Əzimovun fikrincə, istiqlalçı deputatlara qarşı bu cür ögey münasibət hakimiyyətin siyasətidir: «Azərbaycanın müstəqilliyinin əldə olunmasında xidmətləri olanlara, bu ideyanı gerçəkləşdirənlərə qarşı diskriminasiya siyasəti yürüdülür. Biz istiqlalçı deputatlara qarşı ikili standartların şahidiyik. Dünyanın bütün ölkələrində müstəqilliyin əldə olunmasında xidmətləri olan deputatlara ən yüksək qiymət verilir, onların adları əbədiləşdirilir, qayğı, hörmət göstərilir. Amma Azərbaycanda bu şəxslər təzyiqlə üz-üzədir. Azərbaycanda vaxtı ilə müstəqilliyin lehinə səs verənlərin hüquqları tanınmır, onların işlə təmini problemə çevrilir. Məhz bu cür ögey münasibətin, məxməri terrorun nəticəsidir ki, bir çox istiqlalçı deputat dostlarımız vaxtsız vəfat etdilər».
H.Əzimovun fikrincə, vaxtı ilə müstəqilliyin əleyhinə səs verən şəxslər hazırda hakimiyyətdə təmsil olunduğundan istiqlalçı deputatları hədəf alıblar: «Azərbaycanın müstəqilliyinin əleyhinə səsverənlər dövlətin sərvətlərini talayırlar. İstiqlalçı deputatların təzyiqlərlə üzləşməsi dövlətin bir siyasətidir. Dünyalarını dəyişmiş Mürşüd Məmmədli, Ədalət Rəhimlinin vaxtı ilə maddi imkanları olsaydı, xaricdə müalicə olunardılar, Və səhhətlərindəki problemləri həll edərdilər. Amma bu mümkün olmadı. Çünki bu şəxslərin adi deputat təqaüdü belə verilmədi».
İbrahim İbrahimli: «Azərbaycanda istiqlalçı deputatlara ögey yanaşma hakimiyyətin natamamlıq kompleksindən irəli gəlir»
Digər istiqlalçı deputat İbrahim İbrahimli də vurğuladı ki, ölkənin müstəqillik əldə etməsincə xidmətləri olan deputatlara Şərqi Avropa dövlətlərində xüsusi münasibət var. İ.İbrahimli vurğuladı ki, bu dövlətlərdə xarici ölkələrdən gələn nümayəndə heyətlərinin ilk görüşdükləri şəxslər də məhz istiqlalçı deputatlar olur: «Şərqi Avropada istiqlalçı deputatlarla görüş rəsmi protokola salınıb. Azərbaycanda isə Heydər Əliyevin qəbrinin ziyarət olunması protokola salınıb. Azərbaycanda istiqlalçı deputatlara ögey yanaşma hakimiyyətin natamamlıq kompleksindən irəli gəlir. Çünki bu gün hakimiyyətdə olanlar müstəqilliyin əleyhinə səs vermiş deputatlardır. Onlar bu gün Milli Məclisdə, hakimiyyətin müxtəlif strukturlarında, nazirliklərdə təmsil olunublar. Məryəm Həsənovanın da yazısında qeyd etdiyi kimi Milli Məclisin Aparatının rəhbəri Səfa Mirzəyev vaxtı ilə Azərbaycanda müstəqllik hərəkatına qarşı olub. Ümumiyyətlə bu şəxslər iştirak etmədikləri tarixi prosesi tarixi hadisə saymırlar. Heydər və İlham Əliyev də müstəqillik uğrunda mübarizə aparmadıqlarına görə hazırda müstəqilliyə, istiqlalçı deputatlara bu cür yanaşma sərgilənir».
Hazırkı deputatların Azərbaycandakı acınacaqlı sosial durumu nəzərə almadan öz maddiyyatlarını təmin etmək üçün çəkinmədən səylər göstərdiklərini xatırladan İ.İbrahimli vurğuladı ki, bu bir daha hakimiyyətin mahiyyətini göstərir: «İstiqlalçı deputatlar içərisində yeganə qadın deputat olan Məryəm Həsənovanın müraciəti reallığı açıq formada göstərir. Məryəm xanım bir ictimai xadim kimi zəngin bioqrafiyası olan, qürurlu bir şəxsdir. Yetmiş beş yaşlı, qürurlu, mübariz xanım görün hansı vəziyyətə salınıb ki, o dövlət başçısına müraciət edib».
Xəyal
