“Barselona” klubu özünün super ulduzu Lionel Messini satmağı planlaşdırıb.
Virtualaz.org saytı xəbər verir ki, bu barədə “One World Sports” nəşri məlumat yayıb. İddiaya görə, İspaniya klubu Messini 2015-ci ilin ortalarında, futbolçu karyerasının zirvəsində olanda satacaq. “Barsa”nın prezidenti Sandro Rossel 4 dəfə “Qızıl top”a sahib çıxmış argentinalı futbolçunun satışından 200 milyon avro qazanmaq istəyir. Messinin satılmasının klubun uzunmüddətli strategiyasının bir hissəsi olacağı vurgulanır.
Xəbərdə bildirilir ki, Messinin “Barsa”da nüfuzunun xeyli artması komanda daxilində gərginlik yaradıb. Argentinalı futbolçu ilə klub rəhbərləri arasında son aylar fikir ayrılığının yarandığı önə çəkilir. Messinin maaşının artırılaraq Kriştiano Ronaldonun məvacibinə çatdırılmasını tələb etməsi də klub daxilində birmənalı qarşılanmayıb.
Bundan əlavə, Messinin menecerləri braziliyalı futbolçu Neymarın “Barsa”ya transferinə xərclənən məbləğdən narazı qalmışdılar. Bütün bunları nəzərə alan Rossel Messini satmağı hədəfləyib.
