Övladımızın mübarizəsini dəstəkləyirik və onlarla qürur duyuruq
Qarabağ qazisi Zaur Həsənovu intihar həddinə çatdıranlar hələ də azadlıqda gəzsə də, bu hadisəyə etiraz edən gənclər hələ də həbsdədir. Bildiyiniz kimi məlum hadisəyə etiraz əlaməti olaraq gənclər “Qaziləri yandırma” aksiyası keçirdilər. Buna görə ədalətli hökumətimiz gənclərin bir qismini yüksək cərimələrlə, digər qismini isə sutkalıq həbslərlə cəzalandırdı.
Türkel Əlisoy (AXCP) 15, Orxan Carçı (AXCP) 16, Cavid Hacıbəyli (Müsavat) 16, Tural Sadıqlı (Müsavat) 17, Orxan Eyyubzadə (Müsavat) 18, Samir Poladov (bitərəf) isə 15 sutka həbs cəzası aldı. Ancaq bu həbslərlə də rejimin hirsi soyumadı və gənclər aclıq aksiyası keçirməyə məcbur oldu. Bütün bu məhrumiyyətlər yalnız “qazilərimiz yanmasın” şüarına görədir. Bu gənclərin həbsdə olmalarının səbəbi bir ölkə üçün, bir hakimiyyət üçün utanc deməkdir.
Hazırda sutkalıq həbsdə olan gənclərdən bəzilərinin valideynləri “Azadlıq”a öz mövqelərini bildirdilər.
AXCP Gənclər Komitəsinin üzvü Türkel Əlisoyun atası Əhməd Əliyev oğlunun həbsindən narahat olmadığını və bu yolda bütün gənclərə uğur arzuladığını bildirdi: “Mən bilirəm ki, oğlum cinayət törətdiyinə görə yox, düzgün seçiminə görə həbsdədir. Mən də dəfələrlə aksiyalarda iştirak etmişəm. Əsgər ölümlərinə etiraz aksiyalarında da iştirak etmişəm və gənclərlə qürur duymuşam. Mənim oğlum da hər bir vicdanlı vətəndaş kimi bu haqsızlıqların qarşısında susa bilmir, etiraz edir. Türkel dəfələrlə həbs olunub, təzyiqlərlə üzləşib, ancaq öz mövqeyindən dönməyib. Mən oğlumun mübarizəsini dəstəkləyirəm. Gənclərin həbsi hakimiyyətin ədalətsizliyindən xəbər verir. Ölkədə ciddi problemlər var və bu problemlərin həlli ölkə gəncliyinin vtəndaş mövqeyindən asılıdır”.
Müsavat Gənclər komitəsinin üzvü Tural Sadıqlının atası Əlövsət Sadıqlı da oğlunun haqq yolunda olduğunu və onunla qürur duyduğunu bildirdi: “Ölkənin heç bir strukturunda, hakimiyyət nümayəndələrində ədalət anlayışı yoxdur və yanlış yoldadılar. Mənim oğlumun və digər gənclərin ölkədə baş verənlərə etiraz etməsi təbiidir və onların vətəndaş mövqeyidir. Bu gənclər öz vicdanlarının səsinə qulaq asaraq, ədalətsizliklərə dözməyərək etiraz ediblər və öz qanuni haqlarını yerinə yetiriblər. Mən oğlumla fəxr edirəm və onun zülmə qarşı mübarizəsindən qürur hissi keçirirəm. Bu həbslər bizi düzgün mövqedən çəkindirə bilməz. Mən bəzi valideynlər kimi övladımı bu mübarizədən kənarlaşdırmaq fikrində deyiləm. Mənim oğlum vicdanını mədəsinə satanlardan olsaydı, mən onu oğulluqdan çıxarardım. Ötən gün Turalla görüşmüşəm, hamıya salam göndərib, razılığını çatdırır”.
Kaş bütün valideynlər öz övladlarına belə dəstək olaydılar. O zaman gənclər də mübarizələrində ardıcıl olarlar. Valideyinlərin övladlarına dəstək verməsi, onların apardığı mübarizəni təqdir etməsi gənclərin həbs baryerini aşmasında və hakimiyyətin repressiyasının effektivsizliyində müstəsna rol oynayır.
