Gənc oğlan özünü Koroğlu metrostansiyası yaxınlığındakı körpüdən atdı
Bu gün gecə saatlarında metronun “Koroğlu” stansiyasının yaxınlığında, Heydər Əliyev prospektindəki körpüdə intihar hadisəsi qeydə alınıb. 20 yaşlarında bir gənc körpünün dəmir konstruksiyasının üzərinə çıxıb və özünü atacağını bildirib. Ətrafdakılar dərhal Fövqəladə Hallar Nazirliyinə (FHN) və polisə bu barədə məlumat veriblər. Hadisə yerinə gələn FHN-nin Xüsusi Riskli Xilasetmə Xidmətinin əməkdaşları və polislər özünü körpüdən atmaq istəyən şəxsi bu fikrindən dönməyə çağırıblar. Lakin, kimliyi məlum olmayan şəxs özünü körpüdən atıb.
O, təcili yardım vasitəsi ilə 3 saylı şəhər klinik xəstəxanasına çatdırılıb. Xəstəxanadan APA-ya verilən məlumata görə, hələlik şəxsiyyəti müəyyənləşdirilməyən şəxsin həyatını xilas etmək mümkün olmayıb.
FHN-in hadisə ilə bağlı yaydığı xəbərdə deyilir ki, intihar cəhdi barədə qurumun “112” qaynar telefon xəttinə məlumat verilib. Dərhal hadisə yerinə FHN-in müvafiq xilasetmə qüvvələri cəlb olunub, aidiyyəti qurumlar məlumatlandırılıb, intihar cəhdinin qarşısını almaq üçün təhlükəsizlik yastığı quraşdırılıb, intihar etmək istəyən şəxslə müvafiq psixoloji söhbətlərin aparılmasına cəhd olub. Lakin vətəndaş heç bir psixoloji bağlantıya girməyib və intihar niyyətini həyata keçirib. O, körpünün qoruyucu dirəklərinə dəyərək təhlükəsizlik yastığının üzərinə düşüb və dərhal Təcili Tibbi Yardım Stansiyasının həkimlərinə təhvil verilib.
