“Media forum” saytına şiddətli haker hücumları davam edir. Saytın təhlükəsizliyinə cavabdeh olan mütəxəssislər yanvarın 3-də sayta girişi bərpa etməyə müvəffəq olsalar da, bir neçə saat sonra sayt yenidən qapadılıb. Yanvarın 2-də də eyni hal yaşanıb.
“Media forum”a haker hücumları ötən il dekabrın 19-dan başlayıb və dekabrın 31-də pik nöqtəsinə çatıb. Həmin gündən sayt fəaliyyət göstərə bilmir.
2004-cü ilin dekabrında yaradılmış “Media forum” saytı “İnternyus Azərbaycan” İctimai Birliyinin layihəsidir. “Media forum” redaksiyasının yaydığı məlumata görə, fəaliyyətdə olduğu 9 il ərzində sayt heç bir zaman bu qədər kəskin və davamlı haker hücumu ilə üzləşməyib.
