Nəqliyyat naziri Ziya Məmmədova və onun biznes ortağı Hafiz Məmmədova məxsus olan və Xəzərdə iki offşor neft-qaz yatağını istismar edən “Bahar Energy Operating Company” (BEOC) şirkəti 147 neftçinin ixtisar edildiyini bu gün rəsmən elan edib. Şirkət bəyan edir ki, 147 əməkdaşlı əmək müqaviləsi 2014-cü ildə yenidən bağlanmayacaq.
“Bu qərar bütün amillərin diqqətlə öyrənilməsindən sonra qəbul edilib və ən müasir avadanlıqlar tətbiq edən, biznes prosesini avtomatlaşdıran BOEC-in daha effektiv şirkətə çevrilmək səyləri ilə bağlıdır” – deyə şirkətin bəyanatında bildirilir.
BOEC bildirir ki, işdən azad edilmiş əməkdaşlara kömək etmək üçün şirkətin rəhbərliyi onlara altı aylıq əmək haqqı həcmində kompensasiya təyin edib.
“BOEC şirkəti qəbul edilmiş qərarla bağlı təəsüfləndiyini bildirir” deyə bəyanatda vurğulanır.
“Bahar Energy” şirkətinin səhmlərinin 66 faizinə “Hafka” kimi tanınan iş adamı Hafiz Məmmədovun rəhbəri olduğu “Baghlan Group” nəzarət edir. Səhmlərin qalan hissəsi ABŞ-ın Texas ştatında qeydiyyatdan keçən “Greenfields Petrolium”adlı şirkətə məxsusdur. “Bahar Energy” 2009-cu ildə Xəzərdəki “Qum dəniz” və “Bahar” yataqlarının istismarına dair ARDNŞ-lə müqavilə bağlayıb. O vaxtdan dəfərlərlə şirkətin işçilərinin rəhbərlikdən narazılığı baş qaldırıb.
İndi isə H.Məmmədov 150-yə yaxın işçini ixtisara salaraq onlara Yeni İl “sürprizi” edib (Virtualaz.org).
