Milli Şura üzvləri Müsavatın arqumentlərinə münasibət bildirdi
Müsavat partiyası Məclisinin iclasında partiya başqanı Isa Qəmbər çıxış edərək Milli Şurada təmsil olunan qüvvələrin Müsavata qarşı səlib yürüşünə keçdiyini bildirmişdi: “Ya Rüstəm Ibrahimbəyov, ya da Rüstəm Ibrahimbəyov” deyirdilər. Indi də “ya Milli Şura, ya da Milli Şura” deyirlər. Milli Şuranı müqəddəs inək kimi toxunulmaz elan ediblər. 6 aylıq Milli Şuranı müqəddəs elan edənlər 100 illik Müsavat Partiyasına qarşı Səlib müharibəsi elan ediblər”- deyə Isa Qəmbər bildirmişdi.
Ötən gün “Yeni Müsavat” qəzetinə müsahibəsində isə Müsavat partiyasının Məclis sədri Arzu Səmədbəyli partiyanın Milli Şuradan çıxa biləcəyinin mesajını verib: “Biz seçkilərdə qalib gəlsək belə, bunu reallaşdıra bilmədik. Xalqın böyük əksəriyyətini inandırıb seçkiyə gətirsəydik, bəlkə mənzərə bir az dəyişik olardı. Biz istəyirdik ki, geniş müzakirələr aparıb bu vəziyyətdən çıxmanın yollarını arayaq. Açığı, həm Milli Şurada qalmağın, həm də çıxmağın tərəfdarı olanlar var. Amma biz bütün bu məsələləri müzakirə edəndən sonra son nəticəyə gələcəyik. Müsavat olaraq biz bütün bu prosesdə səmimi və var gücümüzlə iştirak etmişik. Milli Şura prezident seçkiləri ilə bağlı qurulmuşdu. Qarşıdan isə bələdiyyə, parlament seçkiləri gəlir. Milli Şura indiki strukturu ilə bu seçkilərdə necə iştirak edəcək? Bu qurum vahid namizədin qəbul olunması üçün yaradılmışdısa, indi fərqli bir proses gəlir, bunu nəzərə almaq lazımdır”- deyə Arzu Səmədbəyli bildirib.
Maraqlı budur ki, bir müddət öncə Müsavat partiyası Milli Şuradan çıxmasını Rüstəm Ibrahimbəyovun fəxri sədrliyi ilə əlaqələndirirdi. Indi isə Rüstəm bəy fəxri sədrlikdən imtina edib və bu bəhanəyə son qoyulub. Bu gün isə Müsavat Milli Şuradan çıxmasını Milli Şuranın strukturu, formatı ilə əlaqələndirir. Yəni bu arqumentlərdə qeyri-müəyyənlik və məntiqsizlik müşahidə olunur.
Milli Şura ona görə uğurlu format hesab edilir ki, bu qurum yalnız siyasi partiyaları deyil, müstəqil şəxsləri, QHT-ləri, hüquq müdafiəçilərini, gəncləri özündə birləşdirə bilib.
Müsavatın Milli Şura ilə bağlı səsləndirdiyi fikirlərə qurumda təmsil olunanlar da münasibət bildirdi.
Milli Şura üzvü Vidadi Mirkamal Milli Şurada təmsilçiliyin könüllü olduğunu və səslənən arqumentlərin bəhanə olduğunu bildirdi: “Milli Şura böyük partiyaların, təşkilatların, ziyalıların, gənclərin birliyidir və hər kəs bu quruma könüllü qoşulub, məcburiyyət olmayıb. Müsavat partiyası da qurumun yaranmasında, fəaliyyətində, Cəmil Həsənlinin seçki kompaniyasında aktiv iştirak edən qurumlardan birdir. Lakin birdən-birə Müsavat partiyası müəyyən şərtlər irəli sürməyə başladı, müxtəlif mövqelər nümayiş etdirdi. Görünən odur ki, Müsavat partiyası Milli Şurada qalmaqda maraqlı görünmür. Əgər kimsə getmək istəyirsə, buna bəhanə də tapacaq. Ancaq biz istəməzdik ki, Müsavat Milli Şuradan getsin və bu demokratik düşərgənin də marağında deyil. Ancaq nə etmək olar? Demək partiya daxilində bir rəy formalaşıb və Milli Şura birlik forması kimi qəbul edilmir. Açığı, mən bu istiqamətdə ikitərəfli görüşlər keçirilməsinin də mənasını başa düşmürəm. Baş verənlər Müsavatın qurumdan qopması ilə nəticələnəcəksə, buna yalnız təəssüflənə bilərik”.
Milli Şura üzvü Fuad Ağayev bildirdi ki, səslənən fikirlər iqtidarın maraqlarını ifadə edir: “Milli Şura son dərəcə mühüm məsələləri qoyub, bəzi şəxslərin Rüstəm Ibrahimbəyovla bağlı əsassız iddialarına vaxt sərf edir və bu, yolverilməzdir. Faktiki olaraq Milli Şuranın diqqəti mühüm məsələlərdən kənarda qalıb və iqtidarın marağında olan məsələlərə yönəlib. Səslənən arqumentlər reaalıqla uzlaşmır və Milli Şura yalnız prezident seçkiləri üçün yaradılmayıb. Bu qurum yaradılanda seçkilərdən sonrakı dövrdə də fəaliyyəti nəzərdə tutulub. Ona görə də mənasız fikirlərə enerji sərf etmək lazım deyil. Ölkədəki siyasi, iqtisadi vəziyyəti dəyərləndirmək lazımdır”.
