«Bir neçə ticarət mərkəzində eyni hüquqsuzluq hökm sürməkdədir»
“Binə” Ticarət Mərkəzində baş verən yanğından sonra bazarın sahibi sahibkarlarla görüşərək onlara yardım ediləcəyinə söz verdi. Məlumatlara görə, dükan sahiblərinə mağazaların tikilməsi üçün lazım olan vəsaitin yarısı ödəniləcək. Ancaq heç bir mağaza sahibi yanan mallara görə kompensasiya ala bilməyəcək.
Deputat Zahid Oruc bir neçə gün öncə Milli Məclisin sessiyasında “Binə”də baş verən yanğın hadisəsindən danışıb.
“Həmin Ticarət Mərkəzində artıq neçənci yanğın handisəsidir ki, baş verir. Biz istintaqçı olmasaq da, bizdə belə bir fikir yaranır ki, bu yanğınlar təsadüfi, hansısa nasazlıq ucbatından baş vermir. Bu, 1917-ci ilin bolşevik sabotajına bənzəyir. ”Binə” ticarət mərkəzində hüquqsuzluq və feodal münasibətləri hökm sürür. Yanğın nəticəsində insanlara böyük ziyan dəyib, bu isə öz növbəsində orta sahibkarlığın inkişafına ciddi zərbə vurur”.
Zahid Oruc “Azadlıq”a açıqlamasında zərərçəkən sahibkarlardan ona müraciət edildiyini söylədi: “Fikrimcə, hər bir parlament üzvünün borcudur ki, bu məsələnin ölkə miqyasında baş verən başqa oxşar cəhətlərlə ümumiləşdirsin, daha geniş təhlil aparsın, istər parlament tribunasından, istərsə də ayrıca yazılı qaydada müvafiq qurumlarla problemi dəyərləndirsin. Iş ondadır ki, sanki bir-birinə bənzər qaydada bir neçə ticarət mərkəzlərində eyni hüquqsuzluq hökm sürməkdədir. Bir tərəfdən vətəndaşlar sahibkarlıq fəaliyyəti üçün müraciət edirlər, çox böyük zəhmətə qatlaşaraq xarici məkanlardan müxtəlif məhsulları Azərbaycana gətirirlər və bunun üzərində hansısa qazanc əldə etməyə çalışırlar. Ancaq bu şərait hüquqi olmalıdır. Insanlar bilməlidirlər ki, konkret hansı müqavilənin şərtləri əsasında fəaliyyət aparırlar, onların gələcək dönəmdə ödənişləri nədən ibarət olacaqdır, öz işlərini bu dövriyyənin əsasında planlaşdırmalıdırlar. Sahibkar sözünün tərkib hissəsi sahiblikdən yaranır. Onlar nəyinsə sahibi olmalıdırlar ki, sahibkara çevrilsinlər. Yer bunların deyil, yalnız içərisində malın üzərində hüquq daşıyırlar. Həftəlik və on gündən bir dəyişən şərtlərin ağırlığı, üstəlik, belə yanğınlar zamanı o malın da sahibi olmurlar. Yəni sığorta etdirmək və başqa bu kimi hüquqi addımlar atmaq iqtidarında deyillər. Ona görə məhz Iqtisadi Inkişaf Nazirliyi bu yöndə addımlar atmalıdır”.
Deputat deyir ki, bir ay öncə nazirliyə müraciət edib və müsbət reaksiya alıb: “Monitorinqlərin aparılması, gerçək vəziyyətin analizi sahibkarların mənafelərinin qorunması yönündə müxtəlif işlər görə bilərlər. Mən yenidən Iqtisadi Inkişaf Nazirliyinə müraciət edəcəm və bu məsələni diqqətdə saxlayacam”.
Ramin DEKO
