Arif Yunus: «Bu təyinatın təsadüf, yaxud məqsədli şəkildə həyata keçirildiyini indidən demək çətindir»
Məhərrəmkənd rayonunun icra başçısı Musaəfəndi Vəlimuradov Dağıstan Prezidenti Ramazan Abdulatipovun Cənub dairəsi üzrə səlahiyyətli nümayəndəsi təyin edilib. Dağıstan KIV-nin yaydığı məlumat görə, 58 yaşlı Vəlimuradov 17 ildir adı çəkilən rayona rəhbərlik edir.
Sadvalçı mövqeyi ilə tanınan Vəlimuradovun rəhbərlik etdiyi rayon Azərbaycanla sərhəddə yerləşir. Məhz onun təşkilatçılığı ilə bu rayonda tez-tez Samur çayının bölünməsi, ləzgilərin hüquqlarının pozulması kimi bəhanələrlə Azərbaycan əleyhinə mitinqlər keçirilir.
Xatırladaq ki, bir neçə gün əvvəl Ramazan Abdulatipov Bakıda səfərdə oldu. Ekspertlər Putinə yaxınlığı ilə seçilən Dağıstan prezidentinin Azərbaycan hakimiyyətinə Rusiya rəhbərliyinin mesajlarını çatdırdığı güman edirdi. Çünki “Milyarderlər Ittifaqı”nın üzvü olan Abdulatipov Azərbaycan hakimiyyəti üçün arzuolunan şəxs deyil. Ancaq Rusiyanın Azərbaycanla qonşu bölgəsinin rəhbəri olaraq Kremlin sözlərini Bakıya çatdırmaq üçün münasib adamdır. Abdulatipovun Bakıya səfəri ərəfəsində Azərbaycana qarşı mənfi münasibət bəsləyən şəxsi yüksək vəzifəyə təyin etməsi də təsadüfi görünmür.
Konfliktoloq Arif Yunus bir tərəfdən Abdulatipovun özünün Dağıstan prezidenti vəzifəsinə yeni təyin olunduğunu, digər tərəfdən, Dağıstanda keçmiş rəhbərlərlə bağlı çoxdandır iş getdiyini deyir. Bəzi vəzifəli şəxslər işdən çıxarılır, onların əvəzinə Abdulatipov öz adamlarını, ilk növbədə Putinə yaxın olanları təyin edir. Yəni Dağıstanda kadr prosesi gedir. O cümlədən Musaəfəndi Vəlimuradovun təyinatı da bu prosesin tərkib hissəsi ola bilər.
Ekspertin sözlərinə görə, bu təyinatın təsadüf, yaxud məqsədli şəkildə həyata keçirildiyini indidən demək çətindir. Ancaq digər tərəfdən, Azərbaycan-Rusiya sərhədləri ilə bağlı xeyli suallar var. Bu məsələlər hələ ki, indiyə kimi həll olunmayıb. Bununla belə ekspert Abdulatipovun təyinatının mesaj olduğunu hesab etmir. Çünki adətən mesajlar daha yüksək səviyyədə olur.
Fizzə
