Ziya Məmmədov avtobuslarda gediş haqqını qaldırmaq istəyir

Nəqliyyat naziri bu məqsədlə kampaniyaya başlayıb

Nəqliyyat Nazirliyinin rəhbərliyi avtobuslarda gediş haqlarının artırılması üçün ciddi iş aparır. Sürücülərə işə çıxmamaq, Nəqliyyat Nazirliyinə, Dövlət Avtomobil Xidmətinə, Nazirlər Kabinetinə və Iqtisadiyyat və Sənaye Nazirliyinə müraciətlər etmək tapşırılır. Daha doğrusu onlara hazır müraciətlər paylanır. Bu müraciətlər redaksiyamıza da daxil olub. Hamısının mətni eynidir. “…Bakı şəhərində sərnişindaşıma xidmətinin səviyyəsini yaxşılaşdırmaq məqsədilə istismarımızda olan marşrut xətlərində istismar olunması üçün kredit yolu ilə yeni iri tutumlu avtobuslar alınmış və hal-hazırda istismar olunur.
Respublikada yanacaq qiymətlərinin artması ilə əlaqədar istismarımızda olan xətlərdə dözülməz vəziyyət yaranıb, belə ki, artıq biz kredit borclarını ödəmək iqtidarında deyilik.
Bununla əlaqədar Bakı şəhərində ictimai nəqliyyatda gediş qiymətlərinə yenidən baxılması üçün Tarif Şurasına göstəriş verməyinizi xahiş edirik”, – deyə müraciətlərdə bildirilir.
Avtobusların əhəmiyyətli hissəsinin Ziya Məmmədova və ona yaxın adamlara məxsus olduğu sirr deyil. Nəqliyyat nazirinin gediş haqlarının qaldırılması üçün canfəşanlığı da bununla bağlıdır.
Bu arada dünən axar.az məlumat yayıb ki, dünən səhər saatlarında 208 və 209 nömrəli marşurut sürücüləri tətil ediblər. Onlar aylıq plan haqqının qaldırılmasına etiraz olaraq bu addımı atıblar.
Lakin bir qədər sonra aksiya dayandırılıb. Nəqliyyat Departamentindən axar.az- bu barədə deyilib: “Həqiqətən də bu gün sürücülər tətil edib və idarəmizə çoxlu şikayət zəngləri daxil olub. Departamentin rəhbəri Yavər müəllim  avtobusların saxlandığı dayanacaqdadır. Sərnişin daşıması bərpa olunub”.