Pərviz Həşimli nazirdən ailəsinin təhlükəsizliyini qorumağı istəyib
Siyasi və vicdan məhbusu Pərviz Həşimli bu gün vəkili Yalçın İmanov vasitəsilə daxili işlər naziri Ramil Usubova müraciət edib. O, 25 dekabrda ailəsinin yaşadığı Yasamal rayonu, Talıblı küçəsindəki 5 mərtəbəli binanın 3-cü mərtəbəsinə üzü maskalı şəxsin qapını döyməsindən narahat olub. O, nazirdən ailəsinin təhlükəsizliyinin təmin olunmasını, baş vermiş hadisənin araşdırılmasını istəyib. P.Həşimli bildirib ki, o evin ünvanını ancaq ən yaxın qohumları bilir.
Vəkil Yalçın İmanov “Azadlıq” a deyib ki, jurnalist bu gün MTN-in İstintaq Təcridxanasında ailə üzvləri ilə görüşüb. Qızı və xanımı ilə görüşən Pərviz Həşimli təcridxanadan Yeni il münasibəti ilə Azərbaycan xalqını təbrik edib. Bütün əqidə dostlarına salam göndərib. Bu barədə jurnalistin xanımı İlahə Həşimova “Azadlıq” a məlumat verib. Jurnalist bildirib ki, ona hələ də abunə olduğu müxalif qəzetlər çatdırılmır.
MTN-nin əməkdaşları jurnalist Pərviz Həşimlini 17 sentyabrda saxlayıb. Ona qarşı Cinayət Məcəlləsinin 206.3.2-ci (qabaqcadan əlbir olan bir qrup şəxs tərəfindən odlu silahın və döyüş sursatının qaçaqmalçılığı) və 228.2.1-ci (qabaqcadan əlbir olan bir qrup şəxs tərəfindən qanunsuz olaraq odlu silah, onun komplekt hissələrini və döyüş sursatını əldə etmə, saxlama, daşıma) maddələri ilə ittiham irəli sürülüb. Sentyabrın 18-də jurnalist barəsində həbs-qətimkan tədbiri seçilib.
“Amnesty International” beynəlxalq hüquq-müdafiə təşkilatı Pərviz Həşimlini vicdan məhbusu elan edib. Təşkilat Pərviz Həşimlinin həbsinin onun jurnalist və hüquq müdafiəçisi kimi göstərdiyi fəaliyyətlə bağlı olduğuna əminliyini bildirib.
Sevinc Vaqifqızı
