“Azadlıq”ın ötən sayında “Gilan” İnşaatçıların əmlakını mənimsəyib” başlıqlı yazı dərc olunub. “Gilan holdinq”in baş hüquqşünası Vüsal Dadaşovun imzasıyla qəzetimizə məktub daxil olub. Şirkət yazılanları təkzib edir və bildirir ki, “Bakı İnşşat-2” ASC özəlləşdirildikdən sonra heç bir alqı-satqı olmamış, səhmlər isə çoxdan rəsmiləşdirilmiş və səhmdarların səhmlər üzərindəki hüquqlarını təsdiq edən səhmdarların reyestrindən çıxarış alınmışdır: “Bu çıxarışı müraciət edən hər bir səhmdar səhmdar cəmiyyətdən ala bilər. “Bakı İnşaat-2” ASC səhmdarlarının səhmlər üzərindəki hüquqlarının rəsmiləşdirildiyini Milli Depozit Mərkəzinə müraciət etməklə də asanlıqla öyrənmək olar. Bunlar kimi digər məlumatlar da həqiqətə uyğun deyildir. Yazıda bildirilir ki, guya torpaq sahəsini “yarıdan çoxu-6,6 hektarı “Gilan”a məxsusdur. Halbuki qeyd olunan ünvanda “Gilan” şirkətinin mülkiyyətində torpaq sahəsi yoxdur. Sözügedən torpaq sahəsi dövlət mülkiyyətində olmaqla “Bakı İnşaat-2” ASC-nin müvəqqəti istifadəsindədir. “Bakı İnşaat-2” ASC-nin 30.08.2013-cü il tarixində keçirilmiş səhmdarların ümumi yığıncağında səhmdarların irəli sürdüyü bütün məsələlər, o cümlədən “torpaq məsələsi” ümumi yığıncağın gündəliyinə salınmış, ətraflı müzakirə edilmiş və qərar qəbul edilmişdir. “Bakı İnşaat-2” ASC-nin ali iradəetmə orqanı səhmdarların ümumi yığıncağıdır. Bəzi məsələlərə bir qrup səhmdarın iddiası ilə məhkəmələrdə də baxılmış, məhkəmə qətnamələri çıxarılmış və qüvvəyə minmişdir. Bundan əlavə hər hansı tələblər irəli sürən səhmdarlar səhmdar cəmiyyətin və “Gilan Holdinq”in rəhbərliyi ilə dəfələrlə görüşmüş, ətraflı müzakirələr aparmışlar. Hər dəfə onlara izah edilmişdir ki, yardımsevər bir şirkət kimi “Gilan” şirkəti “Bakı İnşaat-2” ASC-nin ehtiyacı olan səhmdarlarına da müvafiq yardım edə bilər. Lakin əsassız və ağlasığmaz tələblər təmin oluna bilməz. Əsassız və ağlasığmaz tələblər isə bir qrup səhmdarın onlara “yarısını satmaq yarısında isə mənzil tikintisi aparmaq” üçün torpaq sahəsi verilməsi tələbidir”.
Qeyd edək ki, “Azadlıq” “Bakı-İnşaat-2”-nin səhmdarlarına istinadən xəbər dərc etmişdi. Səhmdarlar deyirlər ki, Evtikmə Kombinatı özəlləşdirildikdən sonra “Gilan” MMC-nin balansına keçib. Nəticədə 12 hektar ərazinin yarısı “Gilan”, qalan hissəsi bir neçə şirkətin ixtiyarına verilib. Onların sözlərinə görə, 372 səhmdar evsizdir və onlar sözügedən ünvanda torpaq istəyirlər. Bununla bağlı məhkəmələrə müraciət etsələr də heç bir nəticəsi olmayıb.
Ramin DEKO