“Aydın deyil ki, polis niyə bu adamı tapa bilmir? Yəqin, fövqəladənin işçisi olduğu üçün onu tutmağa ehtiyat edirlər”
Şirvan şəhərində bıçaqlanma hadisəsi baş verib. Naxçıvan Muxtar Respublikasında yerləşən hərbi hissənin tağım komandiri Fuad Quliyev bıçaqlanıb. Fuad Quliyevin anası Təranə Quliyeva “Azadlıq”a bildirib ki, oğlunu 1988-ci il təvəllüdlü Şirvan şəhər sakini, Fövqəladə Hallar Nazirliyinin əməkdaşı, baş leytenant Musayev Samir Zahid oğlu bıçaqlayıb: “Samir Fuadın keçmiş qaynıdır. Oğlum məzuniyyətə gəlmişdi. Qeydiyyata düşmək üçün gedəndə Samir Fuadı görüb və yaxınlaşaraq ona bıçaq zərbəsi endirib. Görünür, bacısının boşanmasına görə belə edib. Fuad hazırda ağır vəziyyətdədir. 3 gün Şirvan xəstəxanasında reanimasiyada saxlanılıb. Hazırda Bakıda yerləşən hərbi hospitalın reanimasiya şöbəsindədir. Ağciyəri ciddi zədələnib”.
Təranə Quliyeva bildirib ki, Samir Musayev hələ həbs edilməyib. “Polislər deyirlər ki, qaçıb gizlənib, axtarırıq. Mənə aydın deyil ki, polis niyə bu adamı tapa bilmir? Işlərini yaxşı görmürlər. Deyirlər ki, narahat olmayın atası deyib, gətirib təslim edəcək. Indi oturub gözləmək lazımdır ki, atası nə vaxt oğlunu təslim edəcək? Yəqin, fövqəladənin işçisi olduğu üçün onu tutmağa ehtiyat edirlər”.
Təranə Quliyevə qəzetimiz vasitəsilə daxili işlər naziri Ramil Usubova müraciət edib ki, işi nəzarətə götürsün: “Nazirdən xahiş edirəm ki, oğlumu bıçaqlayan şəxs tezliklə tapılıb, layiqli cəzasını alsın”.
