Bu gün Sumqayıtda keçirilən 52 metrlik tortun kəsilməsi və konsert proqramı zamanı maraqlı hadisə baş verib. Hadisə şahidləri “Qafqazinfo”ya bildirib ki, gözlənilmədən orta yaşlı bir kişi İcra Hakimiyyətinin binası qarşısında qurulmuş böyük yolkanın başına çıxıb. Oradan icra başçısı Eldar Əzizovu çağıraraq şəhərdə ayrı-seçkilik etdiyini bildirib və buna son qoymağı tələb edib. “Eldar Əzizov, çıx xalqın qabağına” deyən kişi başçının onu qəbul etməməsinin səbəbini soruşub və ünvanına təhqirlər də səsləndirib. Sumqayıt Polis İdarəsinin əməkdaşları dərhal hadisəyə müdaxilə ediblər və əraziyə kran gətirilərək həmin şəxşi yolkadan endiriblər. Onun Sumqayıt şəhərindəki 4-cu polis bölməsinə aparıldığı bildirilir.
***
Eldar Əzizovun 52 metrlik tortu kəsildi
Sumqayıtda ölkə başçısı İlham Əliyevin doğum günü ilə əlaqədar hazırlanan 52 metrlik tort bu gün kəsilib. Bu, Sumqayıtın icra başçısı Eldar Əzizovun hələ Gəncədə işləyərkən təşkil etdiyi və hər il təkrarladığı tədbirdir. Hər il İlham Əliyevin yaşı qədər uzunluqda hazırlanan tort bu il bir neçə gün gec kəsildri. Əvvəlki illərdə tort dekabrın 24-də – İlham Əliyevin doğum günündə kəsilirdi.
Mediada belə xəbərlər getdi ki, tortu bu il vaxtında hazırlamaq mümkün olmayıb və icra başçısı da buna görə hiddətlənib. Sonradan Sumqayıt İH-dən bu xəbərlər təkzib olundu.
Bu gün yayılan rəsmi məlumatda isə deyilir ki, Sumqayıtda 31 Dekabr Dünya Azərbaycanlılarının Həmrəyliyi Günü və Yeni il münasibəti ilə hazırlanmış tortun təqdimatı olub. Mərasimdə Sumqayıt şəhər İcra Hakimiyyətinin başçısı Eldar Əzizov, millət vəkilləri, şəhər ictimaiyyətinin nümayəndələri iştirak edib.
Təqdim olunan tortun çəkisi 12 tona yaxın olub, üzərində Bakının, Sumqayıtın, Azərbaycanın digər bölgələrinin görüntüləri əks olunub.
Tortun hazırlanmasına türkiyəli iş adamı Müzəffər Əbiloğu rəhbərlik edib. Onun dediyinə görə, tort 10 günə hazırlanıb. Şirniyyatın hazırlanmasında 2250 kiloqram un, 1975 kiloqram şəkər tozu, 1100 kiloqram qoz, fındıq, kokos, 225 kiloqram qatılaşdırılmış süd, 250 litr süd, 300 kiloqram yağdan və s. istifadə olunub.
