Tanınmış vəkil Aslan İsmayılov ictimaiyyəti özünü yandıran və dünən dünyasını dəyişən Qarabağ qazisi Zaur Həsənovun faciəsində bais olan hər kəsin, ilk növbədə isə Səttar Mehbalıyevin məsuliyyətə cəlb olunmasını tələb etməyə çağırıb. Bu barədə o, facebook səhifəsində yazıb:
“Bu gün ləyaqətimizin tapdalanmasına etiraz edən Qarabağ qazisi Zaur Həsənovun dəfnidir.
Əgər bu hakimiyyətin Azərbaycan xalqının ləyaqətinə hörməti, xalqın isə ləyaqətini qoruyacaq qüruru varsa bu gün ölkədə matəm elan olunmalı, Zaur Həsənovun faciəsində əli olan bütün günahkarlar, birinci növbədə Səttar Mehbalıyev cinayət məsuliyyətinə cəlb edilməli, ona bu özbaşnalıqlarında havadarlıq edən qudası Prezident Administrasiyası ictimai-siyasi şöbəsinin müdiri Əli Həsənov və qanunsuz məhkəmə qərarlarının alınmasında yardımçısı olan Ali Məhkəmənin sədri Ramiz Rzayev ən azı vəzifələrindən azad olunmalıdırlar.
Ancaq əvvəl torpaqları, sonra milli ləyaqəti uğrunda mübarizə aparıb həlak olan oğlunun fədakarlığına, faciəsinə dəyər verə bilən xalq – XALQ ola və 31 dekabrda Azərbaycanlıların Milli Həmrəylik gününü qeyd etməyi haqq edə bilər!”.
