Qiymət artımından sonra sürücülər benzinin keyfiyyətindən narazalıq edir
Benzinin bahalaşmasından sonra bu yanacaq növünün keyfiyyətinin artacağını düşünənlər yanılıb. Əksinə indiki benzin əvvəlkidən daha kefiyyətisizdir. Bu barədə bir qrup sürücü “Azadlıq”a bildirib. “Indiki benzin elə bil spirtdir. Uçur. Təsəvvür edin, axşam avtomobilə benzin vurub evə gedirik. Səhər durub görürük ki, bir neçə litr uçub. Keyfiyyəti çox aşağıdır benzinin. Əksər ”zapravkalarda” benzin bu cürdür”, – deyə sürücülər bildirib.
Bu arada Standartlaşdırma, Metrologiya və Patent üzrə Dövlət Komitəsinin sədri Ramiz Həsənov jurnalistlərə açıqlamasında bildirib ki, yanacaqdoldurma məntəqələrində satılan məhsulun keyfiyyəti ilə əlaqədar yoxlamalar aparılacaq. Onun sözlərinə görə, yoxlamaların aparılması üçün göstəriş verilib: “Öncədən bildirilmədən məntəqələrə gedərək nümunələr götürüləcək”. Komitə sədri deyib ki, Sumqayıt şəhərində müasir tələblərə cavab verən laboratoriya fəaliyyət göstərir: “Götürülən nümunələr burada yoxlanılacaq. Bu günə qədər belə bir problem olmayıb. Lakin bu məsələ çox ciddi nəzarətdədir”.
