Baş ofisi Brüsseldə yerləşən Beynəlxalq Insan Hüquqları Müdafiə Assosiasiyası (International Human Rights Protection Association) Anar Məmmədlinin həbsilə əlaqədar bəyanat yayıb. Bəyanatda deyilir: “Azərbaycan hakimiyyətinin Seçkilərin Monitorinqi və Demokratiyanın Tədrisi Mərkəzinin (SMDTM) rəhbəri Anar Məmmədlini səlahiyyətlərindən sui-istifadə, vergidən yayınma ittihamları ilə həbs etməsi həqiqətə uyğun deyil.
Azərbaycanda bu ilin oktyabrın 9-da keçirilmiş prezident seçkisi ifadə, toplaşma və birləşmə azadlıqlarına məhdudiyyətlər şəraitində keçirilib və seçki günü əksər məntəqələrdə çox ciddi problemlər müşahidə edilib. Azərbaycanda seçki kampaniyası siyasi müxalifətin fəaliyyətini məhdudlaşdırmaq, hökumətin fəaliyyətini tənqid edənləri susdurmaq, gənc fəalların həbsi və qeyri-hökumət təşkilatları üzərində nəzarəti daha da gücləndirməklə yadda qalıb. SMDTM də Azərbaycanda keçirilmiş seçkilərin əksər məntəqələrdə monitorinqini aparıb və pozuntular aşkarlayıb. Mərkəzin rəhbəri, vətəndaş cəmiyyəti fəalı Anar Məmmədlinin qanunsuz həbsi göstərdi ki, hakimiyyət repressiyaları nəinki durduqmaq, əksinə gücləndirmək yolunu tutub. Ölkədə siyasi məhbusların artdığı ərəfədə Anar Məmmədlinin də həbs olunması Azərbaycan hakimiyyəti üçün müsbət heç nə vəd etmir. Hesab edirik ki, Anar Məmmədlinin həbsi rəhbəri olduğu təşkilatın seçki saxtakarlığını ifşa etdiyi üçün ona verilən qiymətdir. Mərkəzin rəhbərinə qarşı vergi ödənişindən yayınma, qanunsuz sahibkarlıq və vəzifə səlahiyyətlərini aşma ittihamları qondarmadır. Hakimiyyətin onu ədalətli mövqeyinə görə təqib etdiyi şübhəsizdir. Hesab edirik ki, bu həbs təkcə Anar Məmmədliyə qarşı deyil, bütövlükdə Azərbaycanda vətəndaş cəmiyyətinə, ölkənin Avropaya inteqrasiyasının tərəfdarı olan hər kəsə vurulan zərbədir. Anar Məmmədlinin işi üzrə ədalətli məhkəmə keçirilməli, hakimiyyət siyasi iradə nümayiş etdirməli və beynəlxalq təşkilatlar qarşısında götürdüyü öhdəlikləri yerinə yetirməlidir”.
Ötən il əsası qoyulan Beynəlxalq Insan Hüquqları Müdafiə Assosiasiyası Belçika dövləti tərəfindən rəsmən qeydə alınıb. Beynəlxalq təşkilatın əsas məqsədi riski yüksək olan ölkələrdə insan hüquqları və fundamental azadlıqlarını təbliğ etmək, hüquq müdafiəçilərini dəstəkləmək, dünyada insan hüquqları ilə bağlı halların illik hesabatlarını hazırlamaqdır.
