Büdcə təşkilatları üçün telefon pulu bahalaşdı
Yanvardan etibarən büdcə təşkilatları üçün telefonların aylıq abunə haqqı artırılıb. Bu barədə “Qanun” Nəşrlər Evinin rəhbəri Şahbaz Xuduoğlu məlumat yayıb. Məlumatda bildirilir ki, dünən nəşriyyata bu barədə bildiriş daxil olub. Bildirişdə göstərilib ki, şəhər telefonlarının aylıq abunə haqqı növbəti aydan 7 manat olacaq. Bu günə qədər qiymət 3 manat 50 qəpik idi, yanvardan isə 2 dəfə artaraq, 7 manat olacaq. “Azərpoçt” məsələ ilə bağlı suallara cavab verməyib.
Rabitə və Informasiya Texnologiyaları Nazirliyinin mətbuat xidmətindən bildirilib ki, təsərrüfat hesablı müəssisələrin aylıq telefon haqqı indiyədək 7 manat olub. Onlardan fərqli olaraq, büdcə təşkilatlarının aylıq telefon tarifləri isə aşağı olub. Yanvarın 1-dən başlayaraq, büdcə və təsərrüfat hesablı müəssisələrin aylıq telefon haqları bərabərləşdiriləcək: “Tarif Şurasının qərarına görə, bu məsələ sözügedən formada tətbiq olunacaq. Əvvəl büdcə qurumlarına ənənəvi şəkildə güzəştlər tətbiq olunurdu ki, bu da artıq öz qüvvəsini itirib. Büdcə qurumlarına olan güzəştlər hazırda götürülüb və onlar təsərrüfat hesablı müəssisələrin aylıq telefon haqqıyla bərabərləşdirilib”.
Nigar
