Restoran direktoru yayılan məlumatlara aydınlıq gətirdi
“Azadlıq”ın ötən saylarında prezidentin şəxsi mühafizə xidmətinin rəhbəri Bəylər Əyyubovun bacısı oğlu Osman Isayev və dostlarının məhkəmə prosesi barədə yazı dərc edilmişdi. Məlumat üçün deyək ki, Osman Isayev və dostları “AZURE” biznes mərkəzindəki “Opera sky” restoranında dava salmaqda ittiham edilir. Lakin təqsirləndirilən şəxslər özlərini gunahkar saymır. Hətta Osman Isayev Bakı Apelyasiya Məhkəməsindəki prosesdə günahsız yerə həbs olunduqlarını deyərək hakimiyyətin ünvanına sərt tənqidlər səsləndirib.
Yazıda həmçinin qeyd edilmişdi ki, “Opera sky” restoranı Nərgiz Paşayevə məxsusdur. Lakin restoranın direktoru Mahmud Bəhrami rəhbərlik etdiyi müəssisəsinin Nərgiz Paşayevaya aid ollmadığını bildirib: “Mən ”Opera Sky” restoranının direktoru kimi bəyan edirəm ki, yuxarıda adı çəkilən yazıda bu qurumun professor Nərgiz Paşayevaya məxsusluğuna və ya qeyri rəsmi aidliyinə işarə edilib. Bunlar tamamilə həqiqətə uyğun deyil. Hətta prof. Nərgiz Paşayeva heç bir zaman, təsadüfən də olsa bizim restorana gəlməyib. Belə olan halda əgər kimsə belə bir şayəni yaymaq istəyibsə bilsin ki, cəmiyyətdə adı hörmətlə və uca tutulan alim, xanım haqqında hər hansı bir məlumatı dərc etməzdən əvvəl bu məlumatın həqiqətə uyğun olub olmadığını yoxlamaq hər bir özünə və sözünə hörmət edən mətbuat orqanının borcudur. “Opera Sky” restoranlar şəbəkəsidir və Bakıda 2009-cu ildən fəaliyyət göstərir. Bir sahibkar kimi bizə məxsus olan restoranın adının və hər hansı bir hadisənin tanınmış bir şəxsiyyətin adıyla bağlamağı düzgün saymıram və xəbərin təkzib olunmasını istəyirəm”.
