Yanukoviçin adı isə «ən zəiflər» sırasına düşdü
Ukrayna müxalifətinin aparıcı simalarından biri, «UDAR» Partiyasının lideri Vitali Kliçko ölkəsində ilin siyasətçisi seçilib. Ötən il bu nominasiyanın qalibi müxalifyönlü «Azadlıq» Partiyasının sədri Oleq Tyaqnibok olmuşdu. Kliçkonu bu ada Demokratik Təşəbbüslər Fondunun ekspertləri layiq görüblər. Fondun analitiklərinin qərarı ilə ilin ikinci uğurlu siyasətçisi deputat Pyotr Poroşenko seçilib.
İlin ən zəif siyasətçisi isə Ukrayna prezidenti Viktor Yanukoviç və baş nazir Nikolay Azarov elan edilib. Ekspertlərin fikrincə, 2013-ün ən müsbət hadisəsi «Avromeydan» etirazları, ən mənfi hadisəsi isə hökumətin Avropa Birliyi ilə Assosiasiya sazişini imzalamaması olub. Neqativ olayların ikinci sırasında Ukraynanın dekabrda Rusiya ilə əldə etdiyi razılaşmalar yer alıb. «Avromeydan» olayları ölkənin daxili siyasətinin ən uğurlu hadisəsi kateqoriyasına da liderlik edib. Daxili siyasətdə əsas tənəzzül isə ölkədə yaranmış sosial-iqtisadi böhran, islahatların aparılmaması və buna cəhd edilməməsi hesab olunub.
Fondun ekspertlərinin fikrincə, «Avromeydan»da nümayişçilərin hökumət qüvvələri tərəfindən dağıdılması və bu qüvvələrin cəzasız qalması Ukraynada avtoritarizmi gücləndirib. Ümumilikdə 45 ekspertin rəy verdiyi qiymətləndirmə 2013-ün siyasi yekunlarına və qarşıdakı illə bağlı proqnozlara həsr olunub.
Gültəkin
