Zahid Oruc «Binə» Ticarət Mərkəzinin qəsdən yandırıldığını bildirir
“Insanlarda fikir yaranır ki, bu texniki nasasızlıqdan baş vermir. Sanki 37-ci illərin iqtisadi sabotaj üsulunu həyata keçirir. Bu sahibkarlara ciddi ziyan vurur”. Bu sözləri deputat Zahid Oruc parlamentin dünənki iclasında Binə Ticarət Mərkəzində baş vermiş yanğın barədə danışarkən deyib. Zahid Oruc Əlavə edib ki, sözügedən ticarət mərkəzində çalışan insanların hüquqları da pozulur: “Iqtisadiyyat və Sənaye Nazirliyi bu cür yerlərdə monitorinqlər aparmalıdır. Bu barədə ölkə başçısına məruzə edilməlidir. Cənab prezident də çıxışında məmurlara xəbərdarlıq edib”.
Zahid Oruc “Azadlıq”a bu barədə daha geniş danışıb. Deputat bildirib ki, əslində bu yanğınlar ayrı-ayrı şəxslərin itaətsizliyini qırmaq, onları əzərək özlərinə tabe etmək, hansısa qanunsuz ödəmələrə razı salmaq məqsədilə süni şəkildə törədilir. Deputatın fikrincə, əgər bu yanğınlar 1-2 dəfə baş versəydi bunu təsadüf saymaq olardı. Lakin konkret olaraq “Binə” Ticarət Mərkəzində dəfələrlə yanğın baş verib. “Bu bolşeviklərin iş metodunda görünən elementə daha çox bənzəyir. Digər tərəfdən ”Binə” Ticarət Mərkəzinin və ayrı-ayrı rayonlarda, şəhərlərdə olan iri ticarət obyektlərinin sahibləri işlətdikləri həmin yerləri insanlara tam ağır şərtlərlə icarəyə verirlər. Onların mülkiyyətçiyə çevrilmək imkanları yoxdur. Sanki feodal qaydasında onların üzərində hansısa şəxslər istismar siyasətini yürütməkdədirlər. Tam bir hüquqsuzluq hökm sürür. Niyə belə olmalıdır? O insanlar təkcə var-yoxdan çıxmırlar. Azərbaycanın birinci şəxsinin iradəsi ölkə vətəndaşlarına hörmətlə yanaşılması sahibkarlıq sahəsinə geniş meydan verilməsi təqdirdə nə üçün bazarlarda belə geniş özbaşınalıqlar yaranır? Hesab edirəm ki, hökumət tədbirləri ilə yanaşı, iqtisadi qurumlar həmin məkanlarda fəal şəkildə işə keçməlidirlər. Dövlət başçısının hökuməti yenidən formalaşdırmasından sonra nazirlər elə bilirlər ki, dövlət rəhbəri daha tələbkar bir mövqeyini onların qarşısında qoyub. Kəbirə Məmmədova deyir ki, ora onun özəl obyektidir. Yanan obyektlərin əvəzini hansısa ağır şərtlərlə verəcəkdir. Insanlar niyə zülmətə, zillətə qatlaşır? Hesab edirəm ki, Iqtisadiyyat və Sənaye Nazirliyi həmin ticarət mərkəzlərində monitorinqlər aparmalıdır”.
Yeri gəlmişkən, Fövqəladə Hallar Nazirliyinin yaydığı məlumata görə, tikinti normaları bazar rəhbərliyi tərəfindən pozulub. Lakin bununla belə Kəbirə Məmmədova yanğından zərər çəkən obyektlərin sahiblərinə heç bir kompensasiya ödəməyib.
“Binə” Ticarət Mərkəzində bundan əvvəl də bir neçə dəfə yanğın baş verib. Bu baxımdan Zahid Orucun yanğının qəsdən törədilməsi barədə iddiaları inandırıcı görünür. Hər halda Kəbirə Məmmədova bütün bunlara aydınlıq gətirməlidir.
