İlkin Rüstəmzadə
Allah ASAN xidmətin ömrünü uzun eləsin. Nə deyirik, kötük kimi qabağına itələyirlər. Ölkədə insan haqları pozulur – ASAN xidmət var! Məhkəmə pis gündədir – ASAN yaxşıdır. Təhsil, səhiyyə, seçki, polis… ASAN! Lap Mərkəzi Kəşfiyyat Idarəsinin xüsusi təyinatlılarının adı kimi səslənir ASAN!
Bu sözü eşidən kimi susmalısan! ASAN xidmət – bu adın qarşısında bir qul tək həmişə səcdədə olmaq mənə fəxarətdir!
Elə bil bir az yayındıq, amma eyb etməz, düzəldərik. Məsələn, mən ASAN xidmətdən dövlət idarəçiliyində geniş istifadəni təklif edirəm. Bir çox dövlət qurumlarını ASAN xidmətə vermək, ASAN-ın bazasında altqurum kimi yaratmaq olar.
Konkret təkliflərim var:
1. MSK-nın tam ləğv edə bilərik. Seçkini də ASAN xidmətin ixtiyarına verək. Hər 5 ildən bir ASAN xidmət seçkinin nəticələrini xalqa açıqlasın. Bununla da seçkiyə xərclənən büdcə pullarına, yaltaq-yultağın ağzına atılan vəsaitlərə ehtiyac qalmaz. Seçkidən öncə və sonra bu qədər adamı da dama basmağa ehtiyac qalmayacaq. Heç kim də ölkədə insan haqlarının pozulduğunu deyib hay-həşir salmayacaq.
2. BDU-nun hüquq fakültəsini ASAN xidmətə etibar etsək, xeyli prosedurları sadələşdirmiş olarıq. ASAN xidmətin də məzmunu elə budur. Təsəvvür edin, gülbalalar gəlir, ASAN xidmətə rüsum ödəmir, 4 ildən sonra da gəlib diplom götürür. 4 il universitetə təpik (“pedal”) döyməyə, müəllim söyməyə, hər dəfə ciddi bazarlıq edib qiymət almağa da ehtiyac qalmayacaq.
3. Məhkəmələri yerli-dibli ləğv edib ASAN xidmətin kontoruna çevirmək olar. Ali Birjanın baş makleri Ramiz müəllim özü deyir ki, məhkəmələr prokurorluğun təqdimatlarını 99 faiz halda təmin edir. Belədirsə, məhkəməyə nə ehtiyac? Prokurorluq təqdimatı yazıb verir ASAN xidmətə, müştəri (təqsirləndirilən şəxs) gəlir, tarifə uyğun paket seçir, pulunu ödəyib gedir həbsxanaya, ya da azadlığa. Məhkəməyə gedən xərclər dövlətin cibində qalır, rüsumlar da dövlətin cibinə gedir. Əla deyil?
4. Belə baxanda, prokurorluğu da ləğv etmək olar. Ittihamı da ASAN xidmət versin. Prosedur belə ola bilər: polis tutur, verir ASAN xidmətə. Müştəri gəlir, qarşısına tarif cədvəlini qoyurlar. Filan maddəyə filan qədər iş, “aç-burax” (azadlıq) bu qədər… Müştəri də seçim imkanı qazanır.
Əslində, siyahını çox uzada bilərik. Yer məhdudluğundan hamısını yazmıram.
Ümumiyyətlə, belə baxanda Nazirlər Kabinetinə də ehtiyac yoxdur. ASAN xidmətin bazası əsasında altqurumlar yarada bilərik. Bu qədər korrupsiya da olmaz, adımız da “it dəftərlərinə” tez-tez düşməz.
Nazirlərin, dövlət qurumlarının adlarını ASAN xidmətə uyğunlaşdıra bilərik. Məsələn, DIN – TUTAN xidmət, “Bandotdel” – DÖYƏN xidmət, MTN – ƏZƏN xidmət, Vergi – SAĞAN xidmət, Gömrük – YOLAN xidmət, AZAL – UÇAN xidmət, FHN – SOYAN xidmət, Qafqaz mollaları idarəsi – YUYAN xidmət, Nəqliyyat – MINƏN xidmət, Tarif Şurası – ÇAPAN xidmət…
ASAN xidmətə müxalifətçiləri tutmaq çox effektli olardı. Təsəvvür edin, Prezident Administrasiyasına ASAN xidmətdən sorğu gəlir, “islah olunmalı şəxslər”in siyahısı hazırlanır, verilir xidmətə. Xidmət də müvafiq adamlara e-mail (sosial innovasiya) ilə qərarı göndərir. Tutulacaq adam da gedib dost-tanış, qohum-əqrəbasıyla sağollaşır, gəlir türməyə. Vəssalam! Yoxsa ki, müstəntiq, istintaq, ittiham aktı, vəkil, məhkəmə və s. həngamayə nə ehtiyac var? Xarici düşmənlər, inkişafımızı gözü götürməyən, naftalin iyi verən təşkilatlar da “siyasi məhbus” söhbəti eləməz. Nə siyasi məhbus, a kişi, DAMA BASAN xidmət!
Sonda “benzin qalxdı, niyə bir cümlə yazmırsan?” deyəcək adamlara sözüm var. Manaf Ağayevin reytinqinin siyasətçilərdən artıq olduğu, elliklə Nadir Qafarzadəyə qulaq asılan ölkədə benzin-zad boş söhbətdir…
Bakı Ağır Cinayətlər Məhkəməsi 25.12.2013
