«Azərbaycanda ilk dəfə zorla əmlak əldən almaq tendensiyasını Səttar Mehbalıyev qoyub»
Azərbaycan Həmkarlar Ittifaqları Konfederasiyası (AHIK) önündə Qarabağ qazisi Zaur Həsənovun özünü yandırması son iki gündə gündəmi zəbt edən əsas məsələdir. Hazırda ağır vəziyyətdə xəstəxanada yatan müharibə əlili üstünə bezin tökərək canına qəsd törədib. Zaur Həsənov hələ bir müddət əvvəl cana doyduğunu, pozulan hüququnu bərpa etməkdə aciz qaldığını deyərək özünü yandıracağını bildirmişdi. Onu bu həddə çatdıran isə Azərbaycan Həmkarlar Ittifaqları Konfederasiyası (AHIK) sədri, deputat Səttar Mehbalıyevdir.
Bir neçə ay əvvəl “Azadlıq”a açıqlamasında Z. Həsənov 1995-ci ildə dəniz kənarında istifadəsiz bir ərazini abadlaşdırdığını, orada çay evi açdığını söyləmişdi. Amma ötən ildən Səttar Mehbalıyev tərəfindən ona təzyiqlər başlayıb. Nəticədə məhkəmə qərarı ilə sahibi olduğu çay evi sökülüb.
Z.Həsənov obyekti yenidən tikib istifadə etsə də, bu il yenidən problemlər başlayıb. Mayın 27-də Z.Həsənov S.Mehbalıyevlə görüşüb və AHIK sədri ona bildirib ki, obyektin sökülməsinə razı olsa, Həmkarlar Ittifaqı tərəfindən işlə təmin ediləcək. Ancaq bu vəd yerinə yetirilməyib və Z.Həsənovun obyekti sökülərək hasara alınıb. Bu qanunsuzluğa dözməyən Z.Həsənovun sonradan atdığı addım artıq hər kəsə bəllidir.
* * *
Baş verənlərlə bağlı Səttar Mehbalıyev də mövqe açıqlayıb. ANS-ə açıqlamasında AHIK sədri bldirib ki, Z.Həsənovun özünü yandırma səbəbi məhkəmə qərarından narazı olması olub. Konfederasiya sədrinin sözlərinə görə, Z.Həsənovun 40 kv. metr torpaq sahəsi olub: “Zaur Həsənov o əraziləri qeyri qanuni zəbt edib və Ali Məhkəmə də buna uyğun olaraq qərar qəbul edib. Mənə dedi ki, məhkəmə qərarlarını ləğv et. Mən dedim ki, mənim səlahiyyətim yoxdur. Məhkəmə bunun sökülməsi barəsində qərar verib. Mən bunu edə bilmərəm. Ancaq sənə sanatoriyada iş verilməsi ilə bağlı tapşırıq verə bilərəm. O dedi ki, mən sanatoriyada işləmək istəmirəm”.
S.Mehbalıyev qeyd edib ki, Zaur Həsənov şər atmaqla məqsədini həyata keçirmək istəyib: “Bizi təhdid edirdi ki, mən özümü yandıracam. Bu adama dırnaq vursan, bütün Azərbaycanı qatar bir-birinə. Şər atmaqla şantaj etməklə bu məsələni həyata keçirdi”.
Bu olay S.Mehbalıyevlə bağlı ilk belə hadisə deyil.
Bir neçə il əvvəl tanınmış hüquqşunas Aslan Ismayılov da Həmkarlar Ittifaqı Konfederasiyası ilə oxşar problem yaşayıb.
* * *
“Azadlıq”a açıqlamasında belə bir problemlə üzləşdiyini deyən A.Ismayılov hazırda konfederasiyanın Səttar Mehbalıyev tərəfindən ata malı kimi idarə olunduğunu qeyd edir: “Səttar Mehbalıyev telekanallara müsahibəsində də deyib ki, bu məsələ onluq deyil. Bu tamamilə yalandır. Səttar Mehbalıyellə təxminən iki ilə kimi vuruşan biri kimi deyirəm ki, söhbət ancaq onun öz şəxsi marağı ilə bağlıdır. Mənimlə bağlı bütün məhkəmələri Səttar Mehbalıyev Ali məhkəmənin sədri Ramiz Rzayevin köməkliyi ilə uddu. Bibi Heybətdə ev tikirdim, onu dörd tərəfdən mühasirəyə aldı. Onu ifşa edən, qanunsuzluqları sübut edən materialların mətbuat vasitəsilə yaydığıma görə, məni sakitləşdirmək üçün hasarı sökdü, istədiyimdən də artıq həyət verdi. Bu gün mənimlə Səttar Mehbalıyevin problemi mənim xeyrimə həll olunub. Ondan nə xahiş, nə də minnət etmişəm. Məndən aldığı həyətyani sahəmi artıqlaması ilə qaytarıb. Bu gün istəyir getsin o hasarı da evi də söksün. Bunu məni susdurmaq üçün etmişdi, ancaq bu məsələdən sonra tüpürürəm o evə də, həyatyanı sahəyə də”.
A.Ismayılov Z.Həsənovu yaxından tanıdığını və onun tam haqlı olduğunu da qeyd etdi: “Bu torpaq sahəsi onun idi, həmin sahənin nə Səttar Mehbalıyevə, nə də konfederasiyaya heç bir aidiyyatı yoxdur. Məhkəmə qərarları arxasında gizlənən Səttar Mehbalıyev həmin qərarları qanunsuz olaraq alıb. Onunla problemim olan dövrdə, məhkəmə çəkişmələri zamanı Apelyasiya Məhkəməsi mənim xeyrimə qərar qəbul etdi. Ancaq Ali məhkəmənin sədri Ramiz Rzayev Səttar Mehbalıyevin təkidi ilə Apelyasiya Məhkəməsindən mənə rədd cavabının verilməsini tələb edirdi. Ancaq Apelyasiya Məhkəməsi qanuni qərar çıxardı. Səttar Mehbalıyevlə ortaq olan Ramiz Rzayev həmin qərarı ləğv etdirdi. Qarabağ əlilinin isə öz malını əlindən aldılar, özünü də atdılar bayıra. O gəldi, ona heç bir təmənnasız bir Qarabağ əlili kimi bir neçə dəfə cürbəcür ünvanlara ərizə yazdım. Sonra Səttar onu çağırdı yanına və yazdırdı ki, şikayəti özü yox, Aslan Ismayılov və onun kimiləri ona yazdırıb. Mən də bunu bildim, amma ondan heç bir incikliyim olmadı. Çünki bilirdim ki, bunu zorla ondan alıblar. Həmin ərizəni indi Səttar Mehbalıyevin ortalığa çıxarıb. Ərizəni alandan sonra bir ay işləməyə icazə verdi, sonra da yenə əmlakını əlindən aldı”.
* * *
A.Ismayılovun sözlərinə görə, vətəndaşların haqqını yeməkdə S.Mehbalıyevin şərikləri onun Prezident Administrasiyasının şöbə müdiri olan qudası Əli Həsənov və dostu olan Ali Məhkəmənin sədri Ramiz Rzayevdir. Bu işlərdə Hacıbala Abutalıbov da onlara kömək edir: “Bibi Heybət camaatı illərdir orda abadlıq işləri aparıb. Bataqlıq olan ərazini çirkabdan təmizləyiblər. Hər biri o torpaqları alıb, ailələrini dolandırmaq üçün obyekt açıblar. Obyektlər işə başlayan kimi Səttar Mehbalıyev gəlib hamısını əllərindən alıb. Orda bircə nəfər var. Onun da yanında dayısı oğlunu oturdub 50 faizlə işlədir. Qalanların nəyi var hamısını əllərindən alıb”.
Vəkil Azərbaycanda ilk dəfə zorla əmlak əldən almaq tendensiyasını Səttar Mehbalıyevin qoyduğunu deyir. ilk belə hal isə 2000-ci illərin əvvəlində baş verib: “2000-ci ilin əvvəllərində yaxşı tanıdığım ”Xəyal Holdinq”in sahibi, maştağalı rəhmətlik Fikrət Rəcəbov var idi, sonra özünü öldürdü. Həmin o Fikrət Rəcəbovun Zaqulba tərəfdə “Xəyal” restoranı var idi, Bakının bir nömrəli restoranı idi. Səttar Mehbalıyev həmin yeri zorla Fikrətin əlindən aldı. Bunu özünə qəsd etməzdən əvvəl mənə Fikrət demişdi. Qəsd etməyinin də səbəbi məhz belə hallar oldu. Onun əlindən əmlaklarını aldılar. Artıq borca düşəndə canına qəsd etdi. Yəni bu birinci qəsd deyil. Mənim bildiyim, Səttar Mehbalıyevin qəsdə apardığı ikinci adamdır. Əgər prezident bu halların qarşısını almaq istəyirsə Səttar Mehbalıyevi, Əli Həsənovu, Ramiz Rzayevi dərhal vəzifələrindən azad etməlidir. Biz millət olaraq bunu tələb etməliyik. Əgər bunu tələb etməsək, demək yaşamaq haqqımız yoxdur. Çünki həmin o Zaur Həsənov və onun kimilər bizim vətənimizi, namusumuzu qoruyublar. Onlara da münasibət bizim namusumuza, qeyrətimizə, vətənimizə olan münasibətdir”.
* * *
Vəkil məcburən yazdığı ərizəyə görə onunla üz-üzə gəlməkdən çəkinən Z.Həsənova baş çəkmək üçün xəstəxanaya gəldiyini də bildirdi: “Ərizəni ona məcbur yazdırmışdılar. Ona görə də mənimlə üz üzə gələndə utandığından qırağa çəkilirdi ki, məni görməsin. Amma mən ondan inciməmişdim. Çünki bilirdim ki, müharibə əlilidir. Beş uşağı var. Borca ailəsinə çörək alan adam idi. Indi bizim vətən uğrunda döyüşənlərin balaları borca çörək yeyir. Amma vətən uğrunda döyüşənlərin əmlakını əlindən alan Səttar Mehbalıyevin oğlu ədliyyə naziri Fikrət Məmmədovun oğlunun çənəsini sındırır, həmin gün dərhal Fikrət Məmmədovun müdaxiləsindən sonra həbs olunur, o biri gün həbsdən azad olunur və işdən çıxarılır. Sonra bölmə rəisi təyin olunur, bu gün isə Pirallahıda polis idarəsinin rəisidir. Bizim hakimiyyətin Azərbaycan xalqına, Qarabağ veteranına münasibəti budur”.
Aslan Ismayılovla dedikləri ilə bağlı Səttar Mehbalıyevin mövqeyini öyrənməyə cəhd etdik. Lakin deputatın mobil telefonuna etdiyimiz zənglər cavabsız qaldı. Məsələ ilə bağlı AHIK-in Mətbuat və ictimaiyyətlər əlaqələr şöbəsinin rəhbəri Nazim Ağamirovla əlaqə saxladıq. O, isə bildirdi ki, təmsil etdiyi qurum baş verənlərlə bağlı mövqeyini açıqlayıb və hələlik heç bir əlavəyə ehtiyac yoxdur.
