Akif Nağı: «Insanlara qarşı bu cür davranış qəbulolunmazdır»
Eldəniz Quliyev: «Hakimiyyət yetkililəri «burada mənəm, Bağdadda kor xəlifə» prinsipilə işləyirlər»
Bakının mərkəzində – Qoşa Qala qapısının yaxınlığında yerləşən Azərbaycan Həmkarlar Ittifaqının qarşısında Qarabağ müharibəsi əlili, 5 uşaq atası Zaur Həsənov üstünə benzin tökərək özünü yandırıb. Ətrafdakılar dərhal təcili tibbi yardım çağırıb və Zaur Həsənov xəstəxanaya çatdırılıb. Onun vəziyyətinin həddindən artıq ağır olduğu bildirilir.
Səbail rayon Polis Idarəsindənÿfaktı təsdiqləyərək bildiriblər ki, intihara cəhdin səbəbləri araşdırılır.
Görəsən, Qarabağ müharibəsi əlilini özünü öldürmək həddinə çatdıran səbəb nədir?
Qarabağ Azadlıq Təşkilatı bu olayla bağlı bəyanat yayıb. Təşkilatın rəhbəri Akif Nağı “Azadlıq”a açıqlamasında bildirib ki, Qarabağ və əlil təşkilatlarının hamısı hadisə ilə bağlı bəyanat yayaraq, faciəyə kəskin reaksiya veriblər. Həmçinin bu təşkilatların nümayəndələri Zaur Həsənovun yerləşdirildiyi xəstəxanaya axışırlar: “Palatada həmin insanı görəndə dəhşətə gəldim. Müalicə həkimi də onun vəziyyətinin çox ağır olduğunu söylədi. Bütün Qarabağ və əlil təşkilatlarının hamısı hadisə ilə əlaqədar ora yığışıb”.
Akif Nağı hadisəni rüsvayçılıq və qeyri-insani münasibətin nəticəsi kimi dəyərləndirib: “Istənilən problemi, o cümlədən həmin əlilin işilə bağlı məsələni sivil qaydada həll etmək olardı. Insanlara qarşı bu cür davranış qəbulolunmazdır”.
Milli Şuranın üzvü, tanınmış ziyalı Eldəniz Quliyev deyir ki, Qarabağ əlillərinə münasibət kardinal şəkildə dəyişməlidir: “Qarabağ müharibəsi iştirakçılarına, əlillərinə, veteranlara, qaçqın və məcburi köçkünlərə münasibət kardinal surətdə dəyişməlidir. Bu hakimiyyətin dünya vecinə deyil. Hakimiyyət yetkililəri, məmurlar ”burada mənəm, Bağdadda kor xəlifə” prinsipilə işləyirlər. Nəticədə belə faciələr baş verir. Ürəyim ağrıyır belə mənzərələri görəndə…”
Nigar
