Ukrayna polisi jurnalisti döyənlərdən ikisini həbs etdi
Şübhəli şəxslərdən biri insidentdə iştirakını qəti şəkildə inkar edir
Ukraynada tanınmış jurnalist Tatyana Çornovola hücum edərək döyən şəxslərin istifadə etdiyi avtomobil tapılıb. Bu barədə jurnalist Aleksey Kaçor öz “Facebook” səhifəsində məlumat verib. Onun sözlərinə görə, AA 5399 EN dövlət nömrə nişanlı “Porshe Cayenne” avtomobili Kiyev yaxınlığındakı Brovar şəhərində aşkarlanıb. Avtomobilin barəsində axtarış elan olunmuş sahibi tapılmasa da, iki şübhəli şəxs artıq həbs edilib. Üçücü şəxsin isə kimliyi müəyyən edilib. Daxili İşlər Nazirliyi bu şəxsin 1984-cü il təvəllüdlü Kiyev sakini Sergey Aleksandroviç olduğunu bildirir. Nazirlik şübhəlinin fotosunu yayaraq onu tanıyan və görən şəxslərin polisə müraciət etməsini xahiş edib. Maraqlıdır ki, şübhəli şəxs qismində saxlanılanlardan biri – Aleksandr Xramtsov insidentdə iştirakını qəti şəkildə rədd edir: «Mən günahkar deyiləm, vicdanım təmizdir. Başqa şərh verməyəcəm, hər şey zamanla üzə çıxacaq».
Tatyana Çornovol özü, onun atası və daha bir neçə nəfər də polisə ifadə verib. “Ukrainskaya pravda” qəzetinin müxbiri, eyni zamanda «Avromeydan» fəallarından olan Tatyana Çornovol dekabrın 25-nə keçən gecə hücuma məruz qalıb. Onun avtomobilinin qarşısını kəsən naməlum şəxslər jurnalisti vəhşicəsinə döyüblər. T.Çornovol ağır bədən xəsarətləri və kəllə-beyin travması ilə xəstəxanaya yerləşdirilib. Onun vəziyyətinin orta ağır olduğu bildirilir. Qeyd edək ki, jurnalist hadisədən bir gün əvvəl şəxsi bloqunda daxili işlər naziri Vitali Zaxarçenkonun şəhər kənarındakı nəhəng yaşayış komleksinin şəkillərini yayıb. T.Çornovolun məhz bu səbəbdən cəzalandırıldığı istisna olunmur.
«Avromeydan» fəalları dekabrın 25-də olduğu kimi, dünən də jurnalistin döyülməsinə etiraz olaraq Daxili İşlər Nazirliyinin binası qarşısında piket keçiriblər. Aksiyaçılar Tatyana Çernovolun şəkillərini əllərində tutaraq DİN-dən cinayət işinin obyektiv araşdırılmasını tələb ediblər.
Gürcüstan Ukraynaya nota verdi
Gürcüstan Ukraynaya etiraz notası verib. Buna səbəb Ukrayna tərəfindən Gürcüstanın keçmiş prezidenti Mixail Saakaşvili də daxil olmaqla bu ölkənin 29 vətəndaşının “arzuolunmaz şəxs” siyahısına daxil edilməsidir. Gürcüstanın Ukraynadakı səfiri Mixuil Ukleba bildirib ki, diplomatik nümayəndəlik bu məsələ ilə bağlı izahat alınması üçün Ukrayna Xarici İşlər Nazirliyinə müraciət edib. Qeyd edək ki, dekabrın 24-də Ali Radada Regionlar Partiyasının nümayəndəsi Oleq Tsaryov Ukrayna Təhlükəsizlik Şurasının onun 36 xarici vətəndaşın ölkəyə daxil olmasına qadağa qoyulması barədə müraciətini qəbul etdiyini bildirib. Onun fikrincə, bu xarici vətəndaşlar “ölkədə qeyri-stabillilik yaratmaq məqsədilə müxalifətlə məsləhətləşmələr aparılmasında” iştirak edirlər. Dekabrın 20-də O.Tsaryovun siyahısına daxil edilən “Rustavi-2” televiziya kanalının müxbiri David Kakuliyanın, dekabrın 21-də isə biznesmen Georgi Kikvadzenin Ukraynaya daxil olmalarına icazə verilməyib.
“Avropa Birliyi ilə dialoqu davam etdiririk”
Ukrayna Avropa Birliyi ilə assosiasiya sazişi imzalanması üçün dialoqu öz milli maraqlarına uyğun olaraq davam etdirir. Ukrayna prezidentinin saytının yaydığı məlumata görə, bu barədə ölkə başçısı Viktor Yanukoviç regionlar şurasının iclasında çıxış edərkən deyib. O, Ukraynanın milli maraqlarına cavab verəcək sazişin hazırlanması istiqamətində hökumətin və parlamentin əməkdaşlıq etməsinin vacibliyini vurğulayıb: “Biz Avropa Birliyi ilə real və effektiv əməkdaşlığın gələcək istiqamətləri ilə bağlı dialoqu davam etdiririk. Fasilə dayanmaq mənasına gəlmir. Bu, fikirlərin yenidən nəzərdən keçirilməsi deməkdir. Hökumət və parlamentdən Ukraynaya sərf edən və milli maraqlarına uyğun olan razılaşmanın hazırlanması ilə bağlı sıx əməkdaşlıq etməsini gözləyirəm”.
Yanukoviç: «Ukrayna bürokratik əngəlləri və korrupsiyanı aşmalıdır»
Yanukoviç yaxın vaxtlarda hökumətdə radikal kadr dəyişikliyi edəcəyinin anonsunu da verib. O bildirib ki, ölkənin iqtisadi inkişafını, islahatların aparılmasını ləngidən məmurların aqibəti ağır olacaq. Prezidentin sözlərinə görə, ölkə bürokratik əngəlləri və korrupsiyanı aşmalıdır: «Yaxın vaxtlarda radikal dəyişikliklər olacaq, eləcə də kadrlar sahəsində».
Ukraynada keçirilən sosioloji sorğu isə üzə çıxarıb ki, ölkə vətəndaşlarının yarısı ölkənin Avropa Birliyinə üzv olmasını istəyir. Sorğunun nəticələrinə görə, ukraynalıların 49,1% ölkələrinin Avropa Birliyinə üzvlüyə müsbət baxır, 29,6% isə bunun əleyhinədir. Respondentlərin 21,3% ümumiyyətlə suala cavab verməkdə çətinlik çəkib. Bununla yanaşı ukraynalıların 32% ölkənin Gömrük İttifaqına qəbul olunmasını istəyir. 41,9% isə bunun əleyhinədir.
