Hökumət yeni həbslərin qarşısını aldı; baş nazirin oğlu da istintaqa çağırılıbmış
İstefa verən nazirlərdən vida çıxışı; daxili işlər nazirinin son sözləri sərt oldu
Türkiyədə rüşvət, korrupsiya və çirkli pulların yuyulması ittihamı ilə yeni həbslərə sanksiya verən prokuror cinayət işinin istintaqından kənarlaşdırılıb. “Habertürk”ün verdiyi məlumata görə, cinayət işinin dosyesi dekabrın 25-də aralarında hökumətə yaxın tanınmış şəxslərin, dövlət məmurlarının, iş adamlarının olduğu 30 nəfərin həbsinə və axtarışlara sanksiya verən prokuror Müəmmər Akkaşdan alınıb. Istintaqı bundan sonra Istanbul baş prokurorunun müavini Oktay Ərdoğan aparacaq. Qeyd edək ki, M.Akkaşın imzaladığı sanksiya polis tərəfindən icra olunmayıb. Həbs olunması tələb edilən 30 nəfərin arasında baş nazir Ərdoğanın oğlu Bilal Ərdoğanın da olduğu iddia edilirdi.
“Heç biri əsas gətirmədən işi əlimdən aldılar”
M.Akkaş açıqlama verərək təhqiqatı aparmasına maneə yaradıldığını, açıq şəkildə basqıya məruz qaldığını bildirib. O, işin heç bir əsas göstərilmədən əlindən alındığını deyərək, bütün hüquq camiəsini Türkiyədə müstəqil təhqiqata sahib çıxmağa çağırıb.
Akkaşın bu açıqlamasına Baş prokuror Turan Çolakkadıdan dərhal reaksiya gəlib. Çolakkadı da öz növbəsində, Akkaşı yalan məlumatlar verməkdə və təhqiqatın gizliliyinə xələl gətirməkdə günahlandırıb: “Sizlərə bir prokurorumuz tərəfindən sənəd paylandı. Yalan məlumatlar verildi. Həqiqətləri danışmaq məcburiyyətindəyəm. Dünən mediaya açıqlama verərək bildirmişdik ki, baş prokurorların prokurorlar üzərində nəzarət hüququ var. Bu, qanunda da əksini tapıb. Təhqiqatı baş prokurorlar başladar və işi səlahiyyət verdiyi vəkillər, cümhuriyyət prokurorları aparar. Baş prokurorluqda 200-ə yaxın prokuror çalışır. Bu prokurorlar özbaşına nə təhqiqat başlada, nə də ona son verə bilər. Sistem belədir. Iş təlimatımız var və bu təlimat illərdən bəri icra edilir. Bu qaydalar bu gün qoyulmayıb. Cümhuriyyət prokurorları mediaya verdikləri ictimai əhəmiyyət daşıyan məlumatlar barədə dərhal və ya telefonla, faksla baş prokurora, vəkilə bilgi verməlidir. Hərə özündən bir şey quraşdırsa, xaos olar. Telefonla, faksla məlumatlandırmaları bir yana qalsın, ortada iki ildir heç bir məlumat vermədən həyata keçirilən təhqiqat var. Qeydlərə başqa adlar girib və ya heç qeydiyyat aparılmayıb. Prokuror istəsə, cırıb yox edər, istəsə, işə daxil edər. Nə görən var, nə bilən. Bizim təlimatda qeyd olunur ki, təhqiqat qanuna uyğun şəkildə aparılmalı, gizliliyə əməl edilməlidir. Mediaya açıqlama verə bilərik. Amma bunu ya sözçümüz edir, ya da mətbuat katibimiz. Buna əməl etməyənlərdən, əlindəki sənədləri mediaya ötürənlərdən, təhqiqatı hüquqa uyğun şəkildə aparmayanlardan iş alınar və başqa prokurora verilər. Bu, təlimatda belə göstərilir. Bundan əvvəl də qaydalara əməl etməyənləri dəyişdirmişik”.
“Heç kimdən əmr almıram”
Çolakkadı təhiqatın aparılmasında heç kimdən əmr almadığını bildirib: “Qarşınızda elan edirəm. 35 ildən artıqdır bu işi görürəm. Heç kimdən əmr almaram. Türkiyədə terror işlərini aparan bir prokuroram. Mənim yeganə məqsədim haqqın bərqərar olması, təhqiqatın ədalətli aparılmasıdır. Bir prokuror baş prokurorla, vəkillə danışıb, ertəsi bunu gizli yolla mediaya ötürərmi? Ötürərsə, məqsədi nədir? Kimdən nəyi gizlədir?”
“Haqqımı halal etmirəm, kaş, xəncəri başqaları vuraydı”
Istefa verən nazirlərin vəzifədən gedərkən verdikləri son açıqlamalar mətbuatın diqqətindən yayınmayıb. Avropa Birliyi ilə əlaqələr naziri Egemen Bağış vida çıxışını “onsuz da, adımız zarafatcıl kimi tanınır”, deyərək lətifə ilə yekunlaşdırıb.
Bir gün əvvəl “Lazımdırsa, baş nazir istefa versin. Mən bütün layihələri onun razılığı ilə həyata keçirmişəm və istefama heç bir əsas görmürəm” deyərək qalmaqallı açıqlama verən Ətraf mühit və şəhərsalma naziri Ərdoğan Bayraqdarın budəfəki mövqeyi gözləniləndən tam fərqli olub: “Baş nazirimizə və iş yoldaşlarıma təşəkkür edir, uğurlar arzulayıram”.
Keçmiş daxili işlər naziri Müəmmər Gülərin isə son sözləri sərt olub: “Onlara haqqımı halal etmirəm, kaş, xəncəri başqaları vuraydı”.
Iqtisadiyyat naziri Zəfər Çağlayan “Ailəmi çox diqqətdən kənarda saxladım”, deyərək göz yaşlarını saxlaya bilməyib.
“Sərvət, şəhvət, şöhrət arzusu insanları yoldan çıxarır”
Vəzifədən uzaqlaşdırılan Elm, Sənaye və Texnologiya naziri Nihat Ergünün son sözləri isə maraqlı olub: “Sərvət, şəhvət, şöhrət arzusu insanları yoldan çıxarır. Allaha şükür, parayla-pulla işimiz olmadı”.
Qeyd edək ki, yeni hökumətin tərkibində 10 vəzifədə dəyişiklik olub. Baş nazirin müavini Əmrullah Işlər, Ədliyyə naziri Bəkir Bozdağ, Ailə və sosial siyasət naziri Aişənur Islam, Avropa Birliyi naziri Mövlud Çavuşoğlu, Iqtisadiyyat naziri Nihat Zeybəkçi, Ətraf və şəhərsalma naziri Idris Güllece, Daxili işlər naziri Əfqan Ala, Nəqliyyat naziri Lütvi Elvan, Elm, sənaye və texnologiya naziri Fikri Işıq, Gənclər və idman naziri isə Akif Çağatay Kılıç olub.
Türkiyədə üç nazirin istefasından sonra müxtəlif şəhərlərdə etiraz aksiyaları başlayıb. “Hürriyyət”in verdiyi məlumata görə, aksiyalar Ankara, Istanbul, Izmir, Kocaeli və Mersində keçirilir. Etirazçılar Ərdoğan hökumətinin bütünlüklə istefaya ÿgetməsini tələb edirlər.
Nazirlərin istefası dünya mediasında…
Dünya mediası Türkiyədə baş verən son olayları diqqətdən kənarda qoymur. Xüsusən, nazirlərin istefası dünyanın nüfuzlu nəşrlərinin ön səhifələrində yer alıb. Xəbəri BBC (Ingiltərə) “Tənqidlərə meydan oxuyan türk baş nazir böyük dəyişikliyə getdi”, “Əl-Cəzirə (Qatar) ”Skandalın ortasında türk baş nazir kabineti dəyişdi”; CNN (ABŞ) “Türkiyədəki istefalar: Rüşvət, yoxsa ABŞ-dakı müsəlman din adamıyla iqtidar mücadiləsi?”; “Euronews” (Fransa) “Türkiyədə Ərdoğan hökuməti korrupsioner güclər tərəfindən sarsılır”; “The Huffington Post” (ABŞ) “Skandal Türkiyə diktatoruna yaxınlaşdı. Türk baş nazir rüşvət skandalına görə kabineti dəyişdirdi”; “The Los Angeles Times (ABŞ) ”Üç türk nazir rüşvət təhqiqatı çərçivəsində istefaya getdi”; “Reuters” (Britaniya) “Skandalın və istefaların zərbəsi altında türk baş nazir yeni nazirləri müəyyənləşdirdi”; “The Telegraph” (Ingiltərə) “Üç nazir rüşvət skandalına görə istefaya getdi, türk baş nazir istefa tələbilə üzləşdi”; “The New York Times” (ABŞ) “Rüşvət skandalı yavaş-yavaş Ərdoğana yaxınlaşır” başlığı altında təqdim edib.
