«Qaya» firması 20 yaşını qeyd etməyəcək
Ölkənin bütün sahələrində olduğu kimi qəzet yayımı sahəsində də xeyli problemlər var. Baxmayaraq ki, 2014-cü ilə keçid edirik, hələ də əyalət rayonlarının əksəriyyətində qəzet köşkləri yoxdur, paytaxtda fəaliyyət göstərən yeni köşklər qəzet satışını sonuncu dərəcəli iş kimi qiymətləndirir, bəzi yayım şirkətləri qəzetlərə borcun ödəyə bilmir.
Ölkədə tanınmış yayım şirkətlərindən biri də “Qaya” yayım firmasıdır və bir neçə gündən sonra bu firmanın 20 yaşı tamam olur. Fürsət tapıb “Qaya” yayım firmasının direktoru Xanhüseyn Əliyevə bir neçə sual ünvanladıq.
– Bir neçə gündən sonra “Qaya”nın 20 yaşı tamam olur. Bu 20 illiyi necə qiymətləndirmək olar?
– Keçmişə nəzər salanda görürük ki, yaxşı günlərimiz də, pis günlərimiz də olub. Ancaq bütün çətinliklərə baxmayaraq “Qaya” yaşayıb, yaşayır və yaşayacaq. Ancaq biz 20 yaşımızı qeyd etməyəcəyik. Çünki bizim xeyli köşklərimiz yığışdırılıb və xeyli köşklərimiz hələ də özünə məkan tapa bilmir. Biz arzu edirik ki, köşklərimiz yenidən qaytarılsın və biz bu günü qeyd edək. Bizim köşklərimiz Sumqayıtda, Naxçıvanda da götürülüb. Ümid edirəm ki, yeni ildən, bizim 20 illiyimiz münasibətilə, problemlərimiz həll olunacaq, köşklərimiz bərpa ediləcək. Eyni zamanda arzu edərdim ki, məmur sahibkar münasibəti yüksək səviyyəyə qalxsın, məmurlar ələbaxan olmasın. Çünki Azərbaycanın gələcəyi sahibkarlardan asılıdır.
– Ölkəyə yeni köşklər gətirildi. Sizin də köşk gətirməklə bağlı təklifləriniz, yaxud sizə hansısa təkliflər oldumu?
– Yeni köşklər təxminən il yarım əvvəl gətirildi. Biz müraciət etdik ki, şəhərə yeni köşklər gətirilirsə, imkan verin biz də indiyə qədər şəhərdə qoymadığımız köşkləri yerləşdirək. Ancaq bizimlə razılaşmadılar. Hətta indiki köşklərdən daha müasir köşklər təklif etdik. Yenə də imtina edildi. Yeni köşklərlə əməkdaşlıq edirik və bu köşklərin işə başlamasına xeyli köməklik etmişik.
– Hazırda nə qədər köşkünüz var?
– Məndə olan məlumata görə, şəhərdə 150 köşk fəaliyyət göstərir. “Qaya”nın isə hazırda Bakıda 13 köşkü var. Əvvəl 22 köşkümüz var idi. Hələ 9 köşkümüz şəhərdə yerləşdirilməyib.
– Başqa yayım firmalarının qəzetlərə xeyli borcları var. Sizdə vəziyyət necədir?
– Bizim heç bir redaksiyaya borcumuz yoxdur. Biz hazırda noyabr ayının pulun qurtarmaq üzrəyik. Satılmayan nüsxələri yığırıq, hesabatını aparırıq və satış cədvəli çıxarırıq. Ayın 15-dən sonra biz ödəməyə başlayırıq. Digər firmalarda bu proses ayın 25-dən sonra başlayır.
– Metrolarda qəzetlərin yığışdırlması sizə necə təsir etdi?
– Metrolarda qəzet satışına qadağa qoyulması oxucunun informasiya almaq imkanını məhdudlaşdırdı. Ancaq yayım firması kimi bizim satışımızın artmasına qismən də olsa təsir etdi. Yəqin ki, metro qadağasının təsiri daha çox redaksiyalarda hiss olunub və real nəticələri onlar qiymətləndirə bilər.
– Prezidentin jurnalistlərlə görüşündən sonra siz hansısa dəyişiklik hiss edirsinizmi?
– Bu görüşdən sonra yayımda müəyyən irəliləyişlər oldu. Mətbuat Şurası mənə də müraciət etdi və yayımın inkişafı üçün təklifimizi istədilər. Biz də öz təkliflərimizi hazırladıq və MŞ-yə göndərdik. Ümid edirik ki, bu təkliflər qiymətləndiriləcək və ölkənin müxtəlif bölgələrində qəzet yayımı təmin olunacaq.
