Əli Həsənov Anar Məmmədlinin həbsi ilə bağlı beynəlxalq aləmdən gələn bəyanatlara reaksiya verdi
Hüquq müdafiəçisi Anar Məmmədlinin həbsiylə bağlı beynəlxalq təşkilatlardan hakimiyətə gələn tələbləri iqtidar özünə məxsus formada qarşılayır. Beynəlxalq aləmin A.Məmmədlinin həbsini kəskin qınamasına ilk reaksiya Baş Prokurorluqdan gəlmişdi. Prokurorluq beynəlxalq təşkilatların bu istiqamətdəki bəyanatlarını istintaqa təzyiq kimi dəyərləndirmişdi. ABŞ Dövlət Departamentinin A.Məmmədli olayına reaksiyasına hakimiyyət cavabı Xarici İşlər Nazirliyi vasitəsilə verdi. Azərbaycan XİN-i Dövlət Departamentini şantajda ittiham etdi. Hakimiyyətin beynəlxalq təpkini süngü ilə qarşılamasını hələlik Prezident Administrasiyasının ictimai-siyasi məsələlər şöbəsinin müdiri Əli Həsənovun açıqlaması qapayır. Ə.Həsənov mətbuata açıqlamasında PA-nın A.Məmmədlinin həbsi ilə bağlı prokurorluğun mövqeyini bölüşdüyünü deyib: «Azərbaycan cəmiyyəti Anar Məmmədlinin həbsi ilə bağlı müxtəlif beynəlxalq təşkilatların, dövlətlərin dəyərləndirmələrini və bəyanatlarını mənasız, əhəmiyyətsiz məsələ hesab etmir. Hakimiyyət bu bəyanatları öyrənir və dəyərləndirir. Lakin Azərbaycan cəmiyyətinin özünün idarə olunma metodları, prinsipləri və qanuni əsasları var. Azərbaycanın müvafiq orqanları bu və ya digər addımları atmazdan əvvəl ilk növbədə Azərbaycan dövlətinin maraqlarını, qanunlarımızın tələblərini nəzərə alır. Anar Məmmədlinin həbsi ilə bağlı Baş Prokurorluq lazımı açıqlamanı verib və təhqiqat gedir. Başqa yeniliklər olacaqsa, bununla bağlı da açıqlamalar veriləcək”. Azərbaycan hakimiyyətinin A.Məmmədliylə bağlı beynəlxalq aləmlə açıq qarşıdurma xəttini tutması açıq görünür. Bəs bu siyasət Azərbaycan iqtidarına nə vəd edir?
Leyla Yunus: «Hakimiyyətin bu cür davranışı Azərbaycan iqtidarı üçün ciddi fəsadlar yarada bilər»
Hüquq müdafiəçisi Leyla Yunusun fikrincə, Azərbaycan hakimiyyəti beynəlxalq aləmdən gələn sərt bəyanatlara emosional reaksiya verir. L.Yunusun sözlərinə görə, əslində bu reaksiyalar onu bir daha təsdiq edir ki, A.Məmmədlinin həbsi birbaşa onun fəaliyyəti ilə bağlı olub: «Anar Məmmədlinin seçkiləri monitorinq etməsi nəticəsində beynəlxalq aləmin sərt reaksiyası ilə üzləşən hakimiyyət buna görə özünə məxsus formada qisas alır. Hakimiyyət baş verənlərə emosional reaksiya verir. Elə Anar Məmmədlinin həbsini qınayan beynəlxalq bəyanatlara verilən reaksiya da emosional xarakterlidir».
Hakimiyyətin bu cür davranışının Azərbaycan iqtidarı üçün ciddi fəsadlar yarada biləcəyini düşünən L.Yunus vurğuladı ki, bu cür siyasətin yürüdülməsi hakimiyyət barəsində beynəlxalq aləmdə qəti fikrin formalaşmasına səbəb ola bilər: «Hakimiyyətin bu cür emosional reaksiyaları bir daha göstərəcək ki, hazırkı iqtidarla normal dialoq, danışıqlar aparmaq mümkün deyil. Beynəlxalq aləm Azərbaycan hakimiyyətinin bu reaksiyasından özü üçün müəyyən nəticələr çıxaracaq. Beynəlxalq aləm Azərbaycanda hansı əməkdaşa sahib olduğunu gördüyündən, bu istiqamətdə müəyyən alternativlər axtarışına çıxa bilər. Amma bu istiqamətdə ciddi addımların atılmasını tez bir zamanda müşahidə etməyəcəyik».
Xəyal
