Kütləvi İnformasiya Vasitələrinin İnkişafına Dövlət Dəstəyi Fondu “Azadlıq” qəzetinə yenidən maliyyə yardımı ayıracaqmı? Fondun icraçı direktoru Vüqar Səfərli “Media forum” saytına deyib ki, qəzetin təqdim etdiyi layihənin qəbul olunub-olunmayacağı qurumun Müşahidə Şurasında müzakirə olunacaq: “Qəzetin təqdim etdiyi sənədlər və layihələr qəbul olunub. Həmin layihələrin hamısı qurumun Müşahidə Şurasının iclasına çıxarılacaq. Müzakirələrdən sonra qərar veriləcək.
Şurada təkcə “Azadlıq” qəzetinin deyil, bütün müraciət edən mətbu orqanların layihələri müzakirə olunacaq. Dekabrın 31-nə kimi bütün nəticələr açıqlanacaq”.
“Azadlıq” qəzetinin üstündə Bakı metrosunun rəisi Tağı Əhmədovun və iş adamı Kəbirə Məmmədovanın məhkəmə iddiaları üzrə 65 min manat cərimə vardı. Oktyabr ayında qəzetin bank hesabları bağlanmış, satış nöqtələrindən gələn vəsait bütünlüklə cərimələrin ödənməsinə yönəldilmişdi. Kütləvi İnformasiya Vasitələrinin İnkişafına Dövlət Dəstəyi Fondu buna görə qəzetə maliyyə yardımını dayandırıb.
Bu günlərdə “Azadlıq” üstündəki məhkəmə cərimələrini tam ödəyib və qəzetin bank hesabından həbs götürülüb. Redaksiya Kütləvi İnformasiya Vasitələrinin İnkişafına Dövlət Dəstəyi Fondunun yardımını almaq üçün quruma müraciət edib.
