Zahid Oruc: «Qarabağ qazisi özünə qıyırsa, bu bütövlükdə gələcək mübarizəmizə təsir edir»
Qarabağ qazisi Zaur Həsənovun üzləşdiyi hüquq pozuntularına etiraz əlaməti olaraq özünü yandırması Azərbaycan acı reallığının çılpaqlığı ilə göstərir. Hazırda ağır vəziyyətdə xəstəxanada yatan Z.Həsənov uzun müddət idi ki, özünə qəsd edəcəyini bəyan edirdi. Səbəb isə çox sadədəir. Z.Həsənov hüquqlarının müdafiəsi istiqamətində atdığı addımların heç bir nəticə verməməsidir. Z.Həsənovu bu addımı atmağa vadar edən şəxs isə Azərbaycan Həmkarlar İttifaqları Konfederasiyası (AHİK) sədri, deputat Sətdar Mehbalıyevdir. Amma nə bu yazılara, nə də Z.Həsənovun müraciətlərinə reaksiya verən tapılmışdı.
Bəs baş verən bu faciəvi olay və yalnız xoşbəxtlik nəticəsində sağ qalan Z.Həsənovun başına gələnlərə parlamentin üzvlərinin münasibəti necədir. Onu da qeyd edək ki, bu məsələyə münasibət bildirmək üçün gün ərzində bir çox millət vəkilinə telefon açdıq. Amma cəhdlərimiz bir nəticə vermədi. Maraqlıdır ki, beynəlxalq təşkilatların Azərbaycana insan haqları və demokratiya ilə bağlı iradları gündəmdə olan zaman dərhal Qarabağ problemini qabardan millət vəkilləri Qarabağ qazisinin taleyinə nədənsə susqun yanaşırlar.
Mövzuyla bağlı yalnız millət vəkili Zahid Orucun mövqeyini öyrənə bildik. Onun fikrincə, baş verən hadisə həqiqətən də narahatlıq doğurur. Z.Oruc ümid edir ki, heç olmasa baş verən olaydan sonra Qarabağ qazisinin hüquqlarının bərpası istiqamətində real addım atılacaq. Amma Z.Oruc baş verən halı Qarabağ qazilərinə qarşı ümumi münasibətin təzahürü saymır: «Biz ümumən etiraf etməliyik ki, bu dünyada «müharibə sindromu» deyilən bir anlayışın təzahürüdür. Vaxtı ilə oxşar problemlə ABŞ Vyetnam savaşından qayıdan vətəndaşlarının timsalında rastlaşmışdı. Təbii ki, hazırkı halda hər hansı bir qurumun rəhbərinin fəaliyyətindən problemlər olubsa, onlar ortalığa çıxarılmalı və ona adekvat qiymət verilməlidir. Nəzərə almaq lazımdır ki, bu gün Qarabağ qazisi özünə qıyırsa, bu bütövlükdə gələcək mübarizəmizə təsir edir».
Xəyal
