Bakı Dəmiryolu Vağzalının şəhərin mərkəzindən köçürülməsi planı reallaşmaq üzrədir
Bakı şəhərinin mərkəzindən keçən dəmir yolları köçürüləcək. Dövlət, Şəhərsalma və Arxitektura Komitəsindən Modern.az saytına verilən məlumata görə, şəhərin mərkəzində yerləşən dəmiryolu xətləri bütünlüklə başqa əraziyə köçürüləcək.
Böyük Bakının Regional Inkişaf Planında hətta Bakı Dəmiryolu Vağzalının da şəhərin mərkəzindən kənara çıxarılması nəzərdə tutulub.
Komitədən bildiriblər ki, Bakının Baş Planına uyğun olaraq, gələcəkdə yerüstü metro xətlərinin də tikintisi planlaşdırılır. “Yaxın gələcəkdə paytaxtdakı sıxlığı, tıxacları aradan qaldırmaq üçün elektrik qatarları istifadəyə veriləcək. Eləcə də yerüstü metro xətlərinin istifadəyə verilməsi planlaşdırılır. Məsələn, Abşerondan Dübəndiyə kimi yürüstü metro xətti inşa edilə bilər. Bütün bunların hamısı Bakının Regional Inkişaf Planında konsepsiya kimi irəli sürülüb. Niyyətlər 2030-cu ilə kimi öz həllini tapacaq. Indi bu təkliflərin təsdiqlənməsini gözləyirik”, -deyə Komitədən bildirilib.
Bakı Dəmiryolu Vağzalının paytaxtın mərkəzindən köçürülməsi məsələsi 2009-cu ildən mətbuatın gündəmindədir. Bu layihə 2013-cü ildə başa çatırılmalı idi. O zaman mətbuatda dərc olunan məlumatlara görə, bu layihəyə vəsait ayırmağa maliyyə naziri Samir Şərifov razılıq verməyib. Buna səbəb nəqliyyat naziri Ziya Məmmədovun Vağzalın köçürülməsi planına nə az, nə çox 1 milyard manat dəyər qoyması olub.
